ولسمشر غني هرات ته ورسید
۱۳۹۴ خرداد ۱۱, دوشنبه
اعلان
ولسمشر محمد اشرف غني، له امنیتي ځواکونو سره د لیدنې پر مهال د هغوی ستاینه وکړه او ژمنه یې وکړه چې په جګړه کې د وژل شویو سرتیرو کورنیو ته ورکول کیدونکي پیسې به دوه برابره شي.
غني په افغانستان کې روانه جګړه تحمیل شوې وبلله او ویې ویل چې د دې هیواد په شمال کې د جګړې تودیدل د هغه په خبره د افغانستان د دښمنانو هڅه ده، ترڅو د سولې په خبرو اترو کې د افغان حکومت موقف کمزوری کړي.
په دغه سفر کې له ولسمشرغني سره د افغانستان لوی درستیز، د بهرنیو چارو وزیر، د کانونو او پطرولیم وزیر او د ولسي جرگې یو شمیر استازي مل دي.
هرات ولایت ته د ولسمشر په توګه دا د محمد اشرف غني، دویم سفر دی. هغه تر دې مخکې په خپل لومړي سفر کې د هرات ولایت ۳۰ تنه لوړ پوړي چارواکي له دندو ګوښه کړي وو.