Наскоро договор меѓу Словенија и Хрватска?
23 април 2009
Последниот предлог на еврокомесарот за проширување Оли Рен за решавање на хрватско-словенечкиот пограничен спор, предвидува дека границата на копно и на море ќе ја одреди Aрбитражен суд според принципите на меѓународното право, а излезот на Словенија на отворено море да се темели врз начелото на правичност, добрососедство и според меѓународното право. Арбитражниот суд би имал пет члена. По еден член би именувале Хрватска и Словенија, а трите останати членови двете земји заедно. Доколку Љубљана и Загреб не можат да се договорат околу тоа, тројцата судии би ги именувал претседателот на Меѓународниот суд на правдата.
„Предлогот на Оли Рен кој има силна поддршка од претседателската тројка на ЕУ, е добра основа за изнаоѓање решение. Со овој предлог, во голема мера се уважени познатите хрватски ставови, значи одвојување на билатералниот процес од преговарачкиот, деблокада на хрватските преговори и решавање на пограничното прашање во согласност со меѓународното право пред меѓународно тело. Постојат уште некои елементи околу кои мора да извршиме политички консултации во Хрватска и се надевам дека наскоро ќе излеземе со конечен став“, изјави по бриселските средби, шефот на хрватската дипломатија, Гордан Јандроковиќ. Двете делегации се враќаат на консултации во Љубљана и Загреб, а одговорот се очекува за околу десетина дена.
Меѓувладината конференција одложена
Чешкото претседателство со ЕУ денеска (23.04.2009) го одложи на неодредено време одржувањето Меѓувладина конференција меѓу Хрватска и ЕУ. Хрватско-словенечкото прашање ќе биде на дневен ред во Луксембург, на состанокот на министрите за надворешни работи на ЕУ, кој е закажан за в понеделник. Нова Меѓувладина конференција најверојатно ќе се одржи во мај, а ако претходно се постигне договор и прифаќање на последниот предлог на еврокомесарот Оли Рен би требало да дојде до деблокада на преговорите и Хрватска би требало да ги отвори и затвори 12 поглавја.
Автор: Ален Леговиќ / Невена Георгиевски
Редактор: Елизабета Милошевска Фиданоска