په ورځ کې څومره مالګه کارولې شو؟
۱۳۹۷ مرداد ۲۸, یکشنبه
تر اوسه پورې مو په ډیرو عملي مقالو او د روغتیایې څیړنو په سپارښتنو کې داسې لوستل او اوریدل چې د مالګې استعمال زیان لري. خو د کاناډایې څیړنکو نوي تحقیقات ښېي چې د مالګې د زیانونو په هکله افراط شوی دی.
د کاناډایې څیړونکو نوي تحقیقات د خپل ډول تر ټولو لویې څیړنې دي. په دې تحقیق کې له چين څخه نیولې بیا تر سویډن او کاناډا پورې د ۱۸ هیوادونو ۹۶ زره کسان تر آزموینې لاندې نیول شوي دي او د مالګې د استعمال په ارتباط د دوی روغتیایې حالت په اړه معلومات ثبت او مشخص شوي دي.
کاناډایې څیړونکو د مالګې د استعمال په برخه کې د نړیوال روغتیایي سازمان له خوا ټاکل شوې اندازه ناسمه بللې ده. نړیوال روغتیایي سازمان د مختلفو هیوادونو اتباعو ته سپارښتنه کړې چې په ورځ کې دې له ۵ ګرامه مالګې (سودیم کلوراید) څخه ډيره نه استعمالوي. خو نوو څيړنو ښودلې ده چې تر ۱۰ ګرامه پورې د مالګې استعمال هیڅ کومه ستونزه نه رامنځته کوي.
آیا بی مالګې یا د لږې مالګې غذایې رژیم اړين دی؟
کاناډایې څیړنکي وایې چې د مالګې ډیر استعمال کیدای شي د یو شمیر خلکو له پاره ستونزه یا ناروغي رامنځته کړي، خو د مالګې د خطر په اړه خبره کېدای شي يوازې په ځينو مشخصو خلکو پورې صدق وکړي.
د آلمان د تغذیې ټولنه تر اوسه پورې تر ډیرې اندازې پورې د نړیوال روغتیایې سازمان د سپارښتنې پورې مقیده ده او د مالګې د روزمره مصرف اندازه یې ۶ ګرامه ټاکلې ده. خو نوې څيړنې ښېي چې کیدای شي دغه اندازه تر دې ډيره زیاته وي.
د پخوانیو ارزونو له مخې چې تر اوسه پورې د مالګې د استعمال د اندازې په برخه کې ترې استفاده کیږي، د مالګې د مصرف اندازه د «قلبي سکتې» له خطر سره مستقيم ارتباط لري. خو کاناډایې څیړونکي وایې په دې برخه کې لویه تیروتنه شوې ده.
۱ د مالکې استعمال او قلبي سکته: نوې څيړنې ښېي چې د مالګې له ډیر استعمال سره حتی د زړه د سکتې خطر کمیږي.
۲ مالګه او مغزي سکته: نوو څیړنو ښودلې ده په هغو سیمو کې چې د مالګې کارونه په کې ډیره ده د بیلګې په توګه په چين کې چې (هر کس په اوسط ډول د ورځې ۱۲ ګرامه مالګه استعمالوي) په واقعي ډول د وينې لوړ فشار له مغزي سکتې سره مستقيمې اړيکې لري.
۳ د ډیرې لږې مالګې استعمال: د عمومي باورونو برخلاف، د مالګې تر اندازې کم استعمال کولی شي د قلبي او مغزي سکتې په زیاتوالي کې اغیز ولري.
نوي تحقیقات د مالګې د استعمال په برخه کې پر تعادل ټينګار کوي او په ټولو مواردو کې د ټولو ناروغانو له پاره عمومي سپارښتنه او توصیه ردوي.
کاناډایې څيړونکو د خپلو تحقیقاتو پر مهال یو بل په زړه پورې کشف ته اشاره کړې ده. د پوتاسیم عنصر چې په کیلې، لوبیا یا حبوباتو، خسته بابو او سبو یا پالکو کې په کافي اندازه موندل کیږي، کولی شي د مغزي او قلبي سکتې خطر را کم کړي.
تحقیق کونکي وایې چې دا یوازې د هغو کسانو په برخه کې لیدل شوی دی چې په بدن کې یې د پوتاسیمو دوز لوړ اندازه شوی وي.
هغه نتیجه چې څیړونکو له دې تحقیق څخه اخیستې ده: د مالګې ډیر استعمال بی له شکه د انسان روغتیا ته زیان رسوي، خو د ډاکټرانو او نړیوال روغتیایي سازمان له خوا د مالګې د استعمال د اندازې په اړه پخوانۍ سپارښتنې هم منسوخ او يا رد شوې دي.