په هندوستان کي انسان وژونکې پړانګه وویشتل سوه
۱۳۹۷ آبان ۱۴, دوشنبه
د NDTV ټلویزوني شبکې په حواله د مهارشترا ایالت د ځنگلونو ادارې د «اوني» په نامه د دغې پړانګې د پلټنو او پیدا کولو په موخه یو ۲۰۰ کسیز ټیم په کار گومارلی وو چي په کمرو، بې پیلوټه الوتکو او تعقیبونکو سپیو سمبال وو. دې ډلې تر درو میاشتو وروسته د انسانانو دښمنه دغه پړانګه وموندله او بیا یې وویشته.
ویل کیږي چي دغه شپږ کلنه پړانګه د ۲۰۱۶ میلادي کال له جون میاشتي راهیسې د رالیگوآن په ځنگله کي ډیر کسان وژلي او خوړلي دي. د همدې کال په سپټمبر میاشت کي د هندوستان ستري محکمې د دې پړانګې د ویشتلو اجازه ورکړه. دې پریکړې بیا په انټرنیت کي د حیواناتو د ساتونکو سازمانونو سخت غبرګون راوپاروه. هغوی د«اوني» د ویشتلو پر ضد احتجاجونه وکړل او ویې ویل، چي د ځنگل دارۍ ادارې باید هغه ژوندۍ نیولای وای. خو بیا د دې برعکس ټلویزونونو د هغو خلکو انځورونه هم خپاره کړي دي چي د دغې پړانګې په وژلو باندي خوشالۍ کوي.
په هندوستان کي د نړۍ تر بل هر هیواد ډیر پړانګان ژوند کوي. په دې برخه کې مسوولې ملي ادارې په ۲۰۱۵ کال کي په دغه هیواد کي ۲۲۲۶ پړانګان او پړانګانې حساب کړي دي.
زموږ د آرشیف څخه یو انځوریز البوم:( 21.09.2016)