په بنګله دیش کې اور لګیدني ۶۹ کسان وژلي
۱۳۹۷ اسفند ۲, پنجشنبه
د چهارشنبې په ماښام (۲۰۱۹م کال د فیبرورۍ ۲۰مه) د بنګله دیش په پلازمېنه ډاکه کې د اور لګیدنې په یوه پيښه کې په لسونو کسانو ته مرګ ژوبله اوښتې ده.
د پنجشنبې په سهار د اور وژنې ادارې چارواکو وویل چې دغه اور ۶۹ کسان وژلي دي او په خبره یي ښایي د تلفاتو شمیر لا پسې لوړ شي.
د پولیسو یوه چارواکي د آلمان خبري آژانس ته ویلي دي چې تر۴۰ زیاتو کسانو درملنه شوې ده، چې زیاترو ته د اور له کبله ټپونو اوښتي ول.
د بنګله دیش د اور وژنې ادارې مشر علي احمد، د فرانسې خبرې آژانس ته ویلي دي: «د اور لګیدنې پر مهال سړکونه د ازدهام له کبله بند وو. اور دومره ژر خپور شو چې خلکو ته تيښته ناممکنه وه.»
اور د سیمې پر وخت د شپې پر ۱۰:۴۰ ولګید. دغه پيښه د ډاکه د چوک بازار په سیمه کې رامنځ ته شوې ده، چې د ښار پخوانۍ برخه ده. په دغه ځای کې کوڅې ډیرې تنګي دي او څنګ پر څنګ د استوګنې ودانۍ جوړې دي.
د ځایي تلویزونونو په انځورونو کې ښوول کيږي چې د ودانۍ عمومي دروازه بنده وه او اوسیدونکې له ودانۍ څخه په تیښته نه دي توانیدلي. د عیني شاهدانو په وینا دغه ځای ته څیرمه د وداه مراسم هم تر سره کیدل چې هلته هم د اور لګیدنې په پایله کې یو شمیر کسان ټپیان شوي دي.
د استوګنې په ودانۍ کې د کیمیاوي موادو ګودام
د بنګله دیش د اطفایې د چارواکو په وینا اور د یوې څلور پوړیزي ودانۍ په لاندني پوړ کې ولګید او تر هغه وروسته ډیر ژر نورو درو څیرمه ودانیو ته خپور شو.
د اطفایې یوه چارواکي د فرانسې خبري آژانس ته ویلي دي چې لومړنی تعمیر چې پکښې اور ولګید د کیمیاوي موادو د ګودام په توګه استعمالیده. د هغه په خبره د استوګنې نوري ودانې چې اور یي اخیستی ښایي د کیمیاوي موادو د ګودامونو په توګه کاریدي. ځیني داسې رپوټونه هم ورکړل شوي دي چې احتمالا د ګاز ډبې تر چاودنې وروسته لومړی اور لګیدلی. د ډاکه ټریبیون، په نوم ورځپاڼي په خپل رپوټ کې لیکلي دي چې دغه ودانۍ «د پلاستیکي توکو د ګودام په توګه استعمالیده.»
د اطفایې تر۲۰۰ زیاتو کسانو د اور د خاموشه کولو هڅې کولې، چې تر نهه ساعته هلو ځلو وروسته یي اور کنترول کړ.
په ۲۰۱۰م کال کې هم په ډاکه کې دې ته ورته یوه غمیزه رامنځ ته شوې وه. هغه مهال هم د استوګنې په یوه ودانۍ کې چې کیمیاوي مواد پکې ساتل کیدل، د اور لګیدنې په پایله کې ۱۲۰ انسانانو خپل ژوند له لاسه ورکړ. چارواکو هغه مهال د استوګنې په سیمو کې د کیمیاوي موادو د ساتل کیدو پر ضد اقدامات پیل کړل، خو په وروستیو کلونو کې دغه پلان په دوامداره توګه نه تطبیقیږي.