پاکستان کې پر امنیتي مرکز وسله وال برید کې ۹ کسان وژل شوي

په پېښور ښارکې کې یوه لوړپوړي امنیتي چارواکي د پیښې په تړاو وویل: «په برید کې نهه نیمه پوځي سرتېري او ۱۰ وسله وال وژل شوي دي.» د نوموړي چارواکي په خبره، چې نه یې غوښتل نوم یې واخیستل شي، بریدګرو په چاودېدونکو توکو ډک موټر د امنیتي مرکز دروازې ته په رسولو منفجر کړی دی.

تېره اوونۍ هم په همدې سیمه کې د موټر بم او هاوان بریدونو ۲۱ کسان وژلي وو.

یاد امنیتي چارواکي زیاته کړه، بریدګر له امنیتي ځواکونو سره تر اوږدې نښتې وروسته وتښتېدل، او لږ تر لږه ۳۵ امنیتي کسان په برید کې ټپیان شوي هم دي.

په باجوړ کې یوه بل لوړپوړي حکومتي چارواکي هم د مرګ ژوبلې دغه شمېر تایید کړ. د تحریک طالبان پاکستان یا ټي ټي پي وسله والې ډلې، چې په سیمه کې ډېره فعاله ده، د دغه برید مسوولیت منلی دی.

په یوه بله جلا پېښه کې، د باجوړ د عنایت کلي په سیمه کې درې امنیتي سرتېري هغه مهال ټپیان شول چې د هاوان یوه مرمۍ د سرحدي ځواکونو په کمپ کې ولګېده. د باجوړ دغه خونړۍ پیښه له هغه موټر بم برید وروسته شوی چې د یکشنبې په ورځ یې د بنو د فتح خېل په سیمه کې ۱۵ کسان ووژل، او همدارنګه د مې په ۷مه د هنګو ولسوالۍ د ټل سیمې پر یوه بازار د هاوان برید شپږ کسان وژلي وو.

پاکستان افغانستان تورنوي چې د ترهګرو ته په پټنځایونو کې ځای ورکوي، خو افغانستان دا ادعا ردوي.

د دواړو ګاونډیو هېوادونو ترینګلې اړیکې په وروستیو میاشتو کې تر خونړیو وسله والو نښتو رسېدلې دي، چې پکې د افغانستان پر ښارونو د پاکستان هوايي بریدونه هم شامل دي.