په آلمان کي جنسي تيري کوونکي زندان ته واستول شول
۱۳۹۷ مهر ۱۷, سهشنبه
د آلمان په لویدیځه برخه کې یوې محکمې څلور هلکان د دوشنبې په ورځ د یوې ۱۳ کلنې نجلۍ د ډله ایز جنسي تیري په جرم په زندان محکوم کړل. د ځايي رسنیو په حواله دغه پیښه شپږ میاشتې مخکې رامنځ ته شوې وه.
څارنوالانو ویلي دي چې اته هلکان چې د ۱۴ او ۱۷ کلونو تر منځ دي په اپریل میاشت کې د آلمان په ویلبریت ښارګوټي کې پر دغې نجلۍ باندې جنسې تیری کړی. زیاته شوې ده چې کله چې نجلۍ د لامبو له یوه حوضه د کور پر لور روانه وه نو دغو هلکانو هغه ونو ته په زور بیولې او بیا یې پر هغې باندې ډله ایز جنسې تیری کړی دی. جنسي تیری تر هغه وخته پوري دوام لاره چې له سیمې څخه تیریدونکې یوې ښځې مداخله وکړه او نجلۍ یې له دغو هلکانو څخه خلاصه کړه.
اته واړه هلکان په خټه بلغاریان دي. شپږ تنه یې په اوپرتال کې محکمه شول او دوه نور چې له خپلو کورنیو سره بلغاریا ته ګډه شوي ول، اوس نیول شوي دي.
اصلي برید کوونکو ته څلور کاله بند
د محکمې یوه ویاند د آلمان خبري آژانس ته ویلي دي چې محکمې د تورنو کسانو مشر د څلورو کلونو او نهو میاشتو سزا اورولې او د جرم اصلي شریک یې بیا په څلورو کلونو بند محکوم کړی. پر هغوی باندې پر قرباني د دوه ځله جنسي تیري او د هغې د ژوبلولو تورونه لګول شوي دي. دواړو دغه تورونه تر وروستی شیبې پورې ردول او ادعا یې کوله دغه هر څه د قرباني په رضایت شوي دي.
د آلمان خبري آژانس ویلي چې څارنوالانو دغو دوو کسانو ته د اوو کلونو بند غوښتنه کوله.
دریم تورن په دوو کلونو بند او څلورم بیا په یو کال او اتو میاشتو بند محکوم شوي دي. پاتې دوو تورونو کسانو ته بیا نور جزايي تدابیر په پام کې نیول شوي.
څارنوالانو په محکمه کې د یوه هلک د تلیفون ویدیو، د «دي ان اې» ثبوت او د لاروۍ ښځې بیانونه وړاندې کړې دي. ۱۳ کلنې نجلۍ هم پر خپل ځان د تیري کوونکو په نیولو کې ونډه لرلې ده. هغې د دغو هلکانو له ډلې څخه یو یې د فیسبوک د انځورونو له مخې وپیژند. پولیسو بیا په ویلبیرت کې هغه وموند او په تلیفون کې یې د پیښې یوه ویدیو وموندله. د دغه هلک تر نیول کیدو وروسته بیا پولیس د نورو تورنو کسانو په نیولو هم وتوانیدل.