هند: په ترافیکي پيښه کې ۲۹ تنه وژل شوي

د اسوشیټډ پریس خبري آژانس د رپوټ پر بنسټ د دغه دوه منزله مسافر وړونکي بس ډوله موټر چلوونکی د څو شیبو له پاره ویده شوی وو چې له امله یي بس ۴۰ فټه لاندې په سیند کې لویدلی دی. پيښه د سیمه ایز وخت مطابق د سحر شاوخوا ۴:۱۵ دقیقې رامنځته شوې ده. په دې بس موټر کې په مجموع کې ۵۰ تنه سپاره ول چې زیاتره یي د پيښې رامنځته کیدو پر مهال ویده ول.

د ۲۹ وژل شویو ترڅنګ ۱۸ تنه نور ټپیان شوي هم دي. ټپیان روغتون ته لیږدول شوي چې د شپږ تنو وضعیت یي د اندیښنې وړ دی.

ولسوال ان جي روی کمار، له رسنیو سره په خبره کې وویل: »بس ډیر تیز روان وو او ممکن چلونکی یي ویده شوی وي.«

په هندوستان کې هر کال شاوخوا ۱۵۰ زره انسانان په ترافیکي پيښو کې خپل ژوند له لاسه ورکوي او نږدې ۴۷۵ زره کسان ټپیان کیږي.

آژانسونه/ ش.ن/ ا.ا