سپین بولدک کې د طالبانو او پاکستاني عسکرو ترمنځ نښته شوې

په ټولنیزو رسنیو کې په خپرو شویو انځورونو او ویډیو ګانو کې ګڼ شمیر ټپي شوي کسان په یوه روغتون کې لیدل کیږي چې تر درملنې لاندې دي. تر اوسه پورې د دغې نښتې د دلیل په هکله نه هم پاکستاني چارواکو او نه افغان لوري څه ویلي دي خو د ځینو سرچینو په حواله، نښته په سیمه کې د امنیتي پوستې د جوړیدو له کبله رامنځ ته شوې ده.

څه موده وړاندې د افغانستان او پاکستان تر منځ د چمن او سپين بولدک سرحد تر هغه وروسته وتړل شو، کله چي پر سرحد د ډزو له کبله يو پاکستانی عسکر ووژل شو. چمن د پاکستان په سويل لوېديځ کي واقع سرحدي ښار دی چي د دواړو هيوادونو لپاره د خپلمنځي تجارت لپاره دويم تر ټولو مهم سرحد بلل کيږي. د افغانستان او پاکستان تر منځ د تجارت لومړی مهم سرحد د تورخم پوله ده کومه چي د پاکستان په غرنۍ سيمه کي واقع ده.