1. محتوا ته تګ
  2. اصلي مینو ته تګ
  3. د دویچه ویله نورو پاڼو ته تګ

سلواکیا د ملګرو ملتونو د مهاجرت له تړونه ووتله

۱۳۹۷ آذر ۵, دوشنبه

ډیر ښی اړخي سیاستوال د ملګرو ملتونو سازمان د مهاجرت له شخړیز تړونه په خپله ګټه کار اخلي. اوس سلواکیا هم د هغو هیوادونو په کتار کې شامله شوه چې نه غواړي د ملګرو ملتونو د مهاجرت تړون لاسلیک کړي.

https://p.dw.com/p/38vKC
Slovakei - Neuer Premier der Slowakei - Peter Pellegrini
انځور: Reuters/D. W Cerny

امریکا متحده ایالاتو، اتریش، استرالیا، چک جمهوریت او پولنډ هیوادونو لا مخکې د ملګرو ملتونو سازمان د مهاجرت تړون رد کړی دی. بلغاريا هم له دې تړونه د وتلو ګواښ کړی دی.

اوس د سلواکیا لومړي وزیر پتر پلیګریني د «اسمه» روځپاڼې انټرنټ پاڼې ته ویلي دي «زه د حکومت د مشر په توګه په سلواکیا کې د مهاجرت تړون متن او اعتبار ردوم».

ټاکل شوی ده چې د ملګرو ملتونو سازمان د مهاجرت تړون د دسمبر میاشتې پر ۱۰ او ۱۱ مو نیټو په مراکش کې د غړو هیوادونو د غونډې په ترڅ کې په رسمي ډول تصويب شي. له دې تړون سره به چې له حقوقي پلوه الزامي نه دی، د مهاجرو له اصلي یا مبداء هیوادونو سره د مهاجرت بهیر د ښه سازمان ورکونې په برخه مرسته وشي.

د سلواکیا د بهرنیو چارو وزیر میروسلاو لایچاک، ګواښ کړی وو چې که حکومت هغه غونډه بایکاټ کړي چې د مهاجرت تړون د تصويب له پاره په پام کې نیول شوې ده، نو هغه به استعفاء وکړي. دغه ۵۵ کلن سیاستوال په دې اړه «د رای ورکونکو د ډیرو رایو ترلاسه کولو له پاره د عوامپالو له رقابت» څخه خبردارې ورکړی دی.

Slowakei Miroslav Lajcak
د سلواکیا د بهرنیو چارو وزیر میروسلاو لایچاکانځور: Getty Images/AFP/A. Kisbenedek

اوس پلګریني وویل چې لایچاک ته یې له تړونه د وتلو په هکله خبر ورکړی دی او هیله لري چې د بهرنیو چارو وزیر به دغه پریکړه ومني او د خپل شخصي نظر په پرتله به، د هیواد د خدمت دوام ته لومړيتوب ورکړي.

د سلواکیا حکومت له پریکړې سره اوس نو د ویشګراد په نوم «چې له پولنډ، هنګري، سلواکیا او چک جمهوریت څخه جوړ شوی دی» څلورواړه هیوادونو د ملګرو ملتونو د مهاجرت تړون رد کړ.

شویبله د مهاجرت تړون دفاع وکړه

په آلمان کې هم د ملګرو ملتونو د مهاجرت تړون په هکله بحثونه روان دي. د آلمان د پارلمان(بونډسټاګ) مشر په برلين کې د انتقادونو پر وړاندې له دې تړونه دفاع وکړه.

شویبله د کاتولیک اکاډمۍ په پروګرام کې وویل دا چې ملګري ملتونه په دې توانیدلي دي چې د داسې یوه تړون په برخه کې موافقې ته ورسیږي دا پخپله یوه بریا ده. د آلمان د پارلمان د مشر په خبره شاید هم د دې تړون ټول ټکي له نیمګړتیاو تشې نه وي: «خو لوی تړونونه تل همدا ډول وي» او د دې تړون هیڅ کومه برخه الزامي نه ده.

له امریکا متحده ایالاتو پرته د ملګرو ملتونو سازمان ټولو ۱۹۳ غړو هیوادونو په جولای میاشت کې دې تړون ته مثبته رای ورکړه. په ځانګړي توګه د اروپایې اتحادیې هغه غړي هیوادونه چې ښی اړخي حکومتونه لري او د مهاجرت ضد دي، له دې تړونه مخ ګرځوي.