زېهوفر: تر تمي لږ مهاجر راغلي دي

څرنگه چي په نومبر او ډسمبر میاشتو کي معمولأ لږ انسانان جرمني ته رامهاجر کیږي، نو زېهوفر اټکل کوي،چي هغوی به تر ۲۰۰۰۰۰ کسانو وا نه وړي. دا هغه اندازه ده، چي د زېهوفر په مشرتوب سوسیال مسیحي گوند یې د کاله د لوړ حد ټاکلو غوښتنه کوله او ویلي یې ول، چي تر دې اضافه مهاجر باید جرمني ته راپرې نه ښوول سي.

دغه خبر نن چهارشنبه المانۍ ورځپاڼي «زوید دويچه څایتونگ» د زېهوفر او په پارلمان کي د اتحادي گوندونو د فراکسیون د یوې غونډي د اعضاوو په حواله ورکړی دی.

همدا په تیر جون میاشت کي لا زېهوفر ویلي ول، چي د مهاجرو تعداد د لوی ائتلاف له خوا تعین سوي حد، یعني له ۱۸۰۰۰۰ تر ۲۲۰۰۰۰ ته رسیدلی دی او حتی ورڅخه اوښتی دی.

په همدې دلیل د چپیانو فراکسیون د داخلي مسایلو ویاندې اولا یېلپکه د زېهوفر پر دغه اټکل باندي د«بیري اچولو» د یوه عمل په حیث انتقاد کړی دی.

د لوی ائتلافي حکومت غړي د «لوړ حد» ټاکلو پر موضوع باندي تر ډیرو شخړو او جنجالونو وروسته د مهاجرو له پاره پر پورتني حد باندي موافقې ته ورسیدل، چي په هغه کي نه یوازي هغه مهاجر چي د کاله په جرمني کي مقیم کیږي او راځي، په نظر کي نیول کیږي، بلکي هغه مهاجر هم چي اخراجیږي او یا پخپله خوښه بیرته خپلو هیوادونو ته ځي.

زموږ د آرشیف څخه یو انځوریز البوم:(31.07.2018 )