د تاج محل د داخلیدو ټکټ پنځه برابره لوړ شوی دی
۱۳۹۷ آذر ۲۰, سهشنبه
تاج محل چې نه یوازې په هندوستان، بلکې په ټوله نړۍ کې مینه وال لري، له دې وروسته به ښايي د کمو سیلانیانو کوربه وي. د هندوستان چارواکو دغې تاریخې ودانۍ ته د زیان د رسیدو د مخنیوي او همدا راز د داخلي سیلانیانو د شمیر د کمښت په موخه د داخلیو فیس پنځه برابره لوړ کړی دی. د معلوماتو له مخې په ورځني ډول له دې تاریخي ودانۍ د ۱۰ زرو او ۱۵ زرو ترمنځ لیدونکي لیدنه کوي. یوازې په ۲۰۱۶م کال کې د دغې ودانۍ پر سپینو مرمرو شاوخوا ۶،۵ میلیونه کسان ګرځیدلي دي.
د مغلو د دورې د پاچا شاه جهان د سلطنت په دوره کې خپلې میرمنې ته ډالی شوې یادې تاریخي ودانۍ ته به هندي اتباعو تر دې وړاندې ۵۰ هندي کلدارې د داخلیدو فیس ادأ کاوه. تر دې وروسته دغه بیه ۲۵۰ کلدارو ته لوړه شوې ده. د دې ترڅنګ نړیوال سیلانیان به هم له دې وروسته د شاوخوا ۱۶ ډالرو پر ځای نیږدې ۱۹ ډالر د داخلیدو فیس ادأ کوي.
د هندوستان د تاریخي آثارو د سروې کولو د ادارې یوه چارواکي د فرانسې خبري آژانس ته د بیو د لوړلو په هکله وویل چې موږ له دې امله د داخلیدو فیس لوړ کړی، څو دغې ودانۍ ته د راتلونکو کسانو شمیر کم شي. د سیلانیانو د شمیر د کمولو ترشا بل اصلي دلیل د ځینو سیمو د استهلاک مخنیوی هم په ګوته شوی دی.
د هندوستان اړوند چارواکي وايي چې د فیس په زیاتیدو سره به ښايي د سیلانیانو شمیر د ۱۵ او۲۰ فیصده په شاوخوا کې کم شي او له دې لارې به د دې تاریخي ودانۍ د ترمیم له پاره به لا ډیرې پیسې راټولې شي.
تاج محل ته د داخلیدو له پاره د فیس د زیاتوالي اقدام داسې مهال عملي کیږي چې تر دې وړاندې د دغه هیواد چارواکو د ۱۷ میلادې پیړۍ دغې تاریخي ودانۍ ته د سیلانیانو شمیر په ورځني ډول له ۷۰ زره څخه یوازې ۴۰ زرو ته راټیت او محدود کړ.
د تاریخي آثارو کارپوهان وايي چې په دې تاریخي ودانۍ کې د خلکو ډیره ګڼه ګوڼه د دې سبب ګرځیدلي چې د ودانۍ دیوالونه، بنسټونه او غولی زیان وویني. سربیره پر دې د تاج محل ودانۍ ته نیږدې د یامونا په نامه په سیند کې د حشراتو فاضله موادو هم دغې ودانۍ ته زیان رسولی دی. دغه سیند د هندوستان یو له ککړو سیندونو څخه شمیرل کیږي.