د ایران جګړه؛ تهران وايي د امریکا وړاندیز ته یې ځواب ورکړی

ایران د دوشنبې په ورځ وویل چي د جګړې د پای ته رسولو له پاره یې د امریکا نوي وړاندیز ته ځواب ورکړی دی، او زیاته یې کړه چي د منځګړي له لاري د نظر تبادلې هم رواني دي. دا په داسي حال کي ده چي د ايراني رسنيو په ځينو راپورونو کي د واشنګټن غوښتني «مبالغه» توصيف سوي دي.

د ایران د بهرنیو چارو وزارت ویاند اسماعیل بقايي په یوه خبري کنفرانس کي وویل: «لکه څنګه چي موږ پرون اعلان وکړ، زموږ نظرونه امریکايي اړخ ته رسول سوي دي.»

هغه وويل چي د نظرونو تبادله «د منځګړي پاکستان» له لاري دوام لري.

یوې پاکستاني سرچیني چې له دې هڅو سره بلد ده، رويترز خبري آژانس ته وویل چي د جګړې د پای ته رسولو له پاره د ایران د وړاندیز یوه اصلاح سوې بڼه متحده ایالاتو ته وړاندي سوې ده.

دغي سرچینې د موجوده اختلافاتو د لېرکولو د امکاناتو په اړه د پوښتني په جواب کي وويل: «موږ ډیر وخت نه لرو». هغه زیاته کړه چې دواړه خواوې په دوامداره توګه خپل شرایط بدلوي.

د امريکا ولسمشر دونالد ترمپ د جګړې د پای ته رسولو له پاره يوې موافقې ته د تهران د اړکولو په هڅه کې يو وار بيا د ايران د ويجاړولو ګواښ کړی دی.

ټرمپ پر خپلې سوشیل تروث خواله رسنۍ لیکلي: «د ایران له پاره وخت پر تېرېدو دی او غوره به وي، چې هر څومره ژر کېږي اقدام وکړي. له دې پرته به یې هېڅ څه هم پاتې نه شي».

د اپریل په لومړیو کې د امریکا او ایران تر منځ پر اوربند هوکړه وشوه، چې ټرمپ هغه وغځاوه، خو د ایران د جګړې د پای له پاره لا هم کومه بنسټیزه هوکړه نه ده شوې.

د متحده ایالاتو ولسمشر ټرمپ تېره اونۍ وویل، چې اوربند « په ډېر نازک حالت» کې دی.

ټرمپ پخوا هم په تونده لهجه ایران ته خبرداری ورکړی، چې «ټول تمدن» به یې له منځه ولاړ شي او ګواښ يې کړی وو چي په قصدي توګه به ملکي زېربناوي په نخښه کړي، ترڅو تهران د واشنګټن شرايط ومني.