د آلمان پولیسو ولې دغه طلايي رنګه موټر له سړک لیرې کړ؟
۱۳۹۸ مهر ۲۳, سهشنبه
د آلمان پولیسو په دوسلدورف ښار کې یو طلایي رنګه موټر په دې دلیل له ترافیک څخه و ایست چې رنګ یې «ډیر روښانه» وو. پولیس اندیښمن دي چې له دې موټر څخه د نور انعکاس نورو موټر چلوونکو ته مزاحمت رامنځ ته کولی شي او د سړک ترافیک له ګواښ سره مخامخ کوي.
پولیسو تر هغه وروسته په دې اقدام لاس پورې کړ چې متوجه شول دغه «اس یو وي» موټر ډیر نور منعکسه وي او د څراغونو رڼا یې هم ډیره زیاته ده. پولیس بیا تر څیړنو وروسته یوې بلې ستونزې ته هم متوجه شول او هغه دا چې د دې موټر د شا په اشارې او سلنسر کې هم په احتمالي توګه لاسوهنه شوې ده.
تر څیړنو وروسته د موټر۳۰ کلن چلوونکي ته د دې اجازه ور نه کړل شوه چې خپل موټر وچلوي. پولیسو موټر د سړک له پاره «ناامنه» وباله او هغه یې د ترافیک له جریان څخه و ایست. بیا نو موټر چلوونکی اړ شو چې پیاده خپل کور ته ستون شي.
د پولیسو یوه ویاند هم دغه موضوع تائید کړې ده. اوس به نو کارپوهان موټر وڅیړي او پریکړه به وکړي چې ایا هغه د سړک ترافیک ته ګواښ رامنځ ته کوي او که نه.
الیوت دوگلاس/ م.س