ولسمشر غني په هرات کې؛ خبریالانو یې پوښښ تحریم کړی | افغانستان | DW | 21.01.2021
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

افغانستان

ولسمشر غني په هرات کې؛ خبریالانو یې پوښښ تحریم کړی

هرات ولایت ته د ولسمشر محمد اشرف غني د سفر هدف د دې ولایت د عمومي وضعیت ارزونه بلل شوې خو د هرات یو شمیر ښاریانو دغه سفر ته غبرګون ښوولی دی او دغه سفرونه یې نمایشي بللي دي. خبریالانو هم د ولسمشر غني دغه سفر تحریم کړی.

انځور له آرشیف څخه اخیستل شوی دی.

انځور له آرشیف څخه اخیستل شوی دی.

که څه هم هرات ولایت ته د ولسمشر غني دغه رسمي سفر د دې ولایت او سیمې د امنیتي وضعیت ارزونه بلل شوې خو د هرات یو شمیر ښاریان بیا دغه سفر سمبولیک ګڼي.  له ولسمشر غني سره په دې سفر کي د هغه لمړی مرستیال امرالله صالح، د ملي امنیت سلاکار حمدالله محب د کابیني بوشمر غړي هم مل دي.

ولسمشر د خپل سفر په پیل کي د هرات نړیوال هواېې ډګر د خواجه عبدالله انصاري په نوم ونوموی او په دې هکله په جوړو شویو مراسمو کې یې وویل چې نن د خوشحالۍ ځاې دی چي حکومت یو ځل بیا د داسې روحاني شخصیت د نوم د ژوندي ساتلو هڅه کوي چي نیک نوم یې پر نړۍ خپور دی. ولسمشر غني تر دې  وروسته د ۲۰۷ ظفر قول اردو پر لور ستون شوو تر څو هلته د پوځي چارواکو او د لویدیځ د میشتو مسئولینو او افسرانو سره لیده کاته وکړي.

تمه ده چي ولسمشر په هرات کې د دولتي اتفاق اسلام  ورځ پاڼي د سل کلنۍ کلیزي او د هرات د ادبي انجمن په کلنۍ غونډه کي هم ګډون وکړي.

بلخوا د هرات یو شمیر ښاریان تر ډیره د ولسمشر یاد سفر نمایشي بولي او انتقاد کوي چي د ولسمشر په راتګ سره د دوو ورځو له پاره بازار بندیږی او خلک کاروبار ته نه پریښودل کیږي. د دوی په خبره ښار امنیتي بڼه خپلوي او تر ډیره بریده په اوسنیو بدو امنیتي او اقتصادی شرایطو کي د دارنګه سفرونو تر ګټي خلکو ته زیان ډیر رسیږی.

د خبریالانو تحریم

بل لوري ته هراتي خبریالانو د ولسمشر د راتګ خبر ځکه تحریم کړ چې تمه وه ولسمشر یا هم د هغه لمړی مرستیال امرالله صالح د ژورنالستانو پوښتنو ته ځواب و وایي خو داسې ونسول او تر ساعتونو انتظار وروسته پریکړه وشوه چي د ولسمشر د ویاند مرستیال دوا خان مینه پال د خبریالانو پوښتنو ته ځواب ووایي.

په لویدیځ کي د خبریالانو د امنیت او خوندیتوب کمیټې مسئول همایون نظري، وویل چې په اوسنیو سختو شرایطو کي ورځ تر بلې د بیان ازادۍ او معلوماتو ته د لاس رسي پر وړاندي محدودیتونه زیاتیږي نو لازمه وه چې ولسمشر دلته د خبریالانو پر وړاندي د هغوې مسلک ته په درناوي سره حاضر شوې واې او د دوی پوښتنو ته یې ځواب ورکړی وای.

ولسمشر غني داسې مهال هرات ته سفر کوي چې د هیواد په غرب کې دغه ولایت په ورستیو کي د پراخي نا امنۍ، ترور، سړي تښتونو او د طالبانو د پراخو تحرکاتو او د افغان ځواکونو د تلفاتو شاهد وو.

عتیق الله مطمئن، هرات