د ایران، چین او روسیې ګډي سمندري مانورې پيل شوې
۱۴۰۰ بهمن ۱, جمعه
د فرانسې خبري آژانس د رپوټ پر بنسټ تهران اعلان کړی دی چې په دغو مانورو کې د ایران د سمندري ځواکونو یولس او درې د سپاه پاسداران واحدونه ګډون لري. همدارنګه په دغو مانورو کې د روسيې د سمندري ځواکونو درې او دوه د چین د سمندري ځواکونو واحدونه هم ګډون لري.
دغه مانورې په ۱۷ زره کیلومتره مربع پراخه ساحه کې ترسره کیږي. د ۲۰۱۹م کال په پای کې هم دغو درو هیوادونو په عمان خلیج او هند اوقیانوس کې ګډ پوځي سمندري تمرینونه وکړل.
دویم ایډمیرال مصطفی تاج الدیني چې د دغو مانورو یو ویاند هم دی د مشرق خبري آژانس ته ویلي دي چې دا دریمي ګډي مانورې دي چې د چین، ایران او روسیې هیوادونو په موجودیت کې ترسره کیږي او په راتلونکي کې به هم دوام پيدا کړي. نوموړي پوځي قوماندان د دغو نظامي مانورو پيغام «سوله او دوستي» اعلان کړې ده.
د ایران، چین او روسیې ګډې مانورې په داسې یو وخت کې ترسره کیږي چې د ایران ولسمشر ابراهیم رئیسي دا مهال د روسیې په دوره تللی دی. په عین وخت کې د آلمان، بریتانيا او فرانسې هیوادونو ترڅنګ چین او روسیه اټومي موافقې ته د بیرته ستنیدو په خاطر په وین کې له ایران سره په خبرو اترو بوخت دي.
آژانسونه: ش.ن/ن.ز