یوناما په افغانستان کي د خپلو ۵ ساتونکو پر مرگ خواشيني ښودلې | افغانستان | DW | 12.02.2021
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

افغانستان

یوناما په افغانستان کي د خپلو ۵ ساتونکو پر مرگ خواشيني ښودلې

په افغانستان کي د ملګرو ملتونو سیاسي نمایندګۍ «یوناما» د دغي ادارې د عامه ساتني د ریاست د هغو پنځو تنو افغان ساتونکو د وژلو په هکله اندیښنه ښودلې چی پرون د سروبي په ولسوالۍ کي ووژل سول.

په افغانستان کي د یوناما پنځه تنه افغان ساتونکي د پنجشنبې په ورځ د کابل- جلال آباد پر لار په يوه بريد کي ووژل سول. د امنيتي سرچينو د معلوماتو له مخي د يوناما پر کاروان تر بريد وروسته د ساتونکو يو موټر له لاري وتلی او رود ته لوېدلی دی.

د ملګرو ملتونو سازمان د یوې اعلامیې په خپرولو سره ویلي دي چي دغه برید د عامه ساتني تصدۍ ریاست پر هغو موټرو سوی چي د ملګرو ملتونو کاروان یې بدرګه کاوه.

په افغانستان کي د یوناما دفتر همدارنګه په یوه تویتري پیغام کي لیکلي چي د نوموړي ادارې هیڅ کارکوونکی زخمي یا وژل سوی نه دی. دا لا معلومه نه ده چي دغه برید چا کړی دی.

خو په افغانستان کي د حکومت مخالفه ډله وسله وال طالبان پر امنيتي ځواکونو بريدونه کوي او دغه شان داعش ډله هم فعاله ده.

AG/G.P/N.Z

اعلان