سعودي او حوثیانو یو بل ته مرګ ژوبله اړولې ده | آلمان او نړۍ | DW | 25.12.2021

د دویچه ویله نوې پاڼه وګورئ

د dw.com بیټا بڼه تر اوسه پورې بشپړه شوې نه ده. ستاسې نظر د دې پاڼي په لا ښه جوړولو کې مرسته کولی شي.

  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

آلمان او نړۍ

سعودي او حوثیانو یو بل ته مرګ ژوبله اړولې ده

د سعودي عربستان پر جازان ښار د حوثیانو په برید کې دوه تنه ملکيان وژل شوي او ۷ نور ټپیان دي. په دغه برید کې ودانۍ او موټرې هم زیانمنې شوي دي. د سعودي په مشرۍ پوځي ائتلاف په برید کې بیا ۳ تنه وژل شوي او ۶ نور ټپیان دي.

رویټرز خبري آژانس د سعودي عربستان د دولتي خبري آژانس په حواله رپوټ ورکړی دی چې د جمعې په ورځ (د دسمبر میاشتې ۲۴ نیټه) د سعودي عربستان په جازان ښار کې د حوثي یاغیانو په برید کې یو سعودي او یو یمني وګړی وژل شوي دي.

د سعودي دولتي رسنیو د دغه هیواد په مشرۍ پوځي ائتلاف په استناد لیکلي دي چې د حوثیانو په برید کې ۷ تنه نور ملکیان ټپیان شوي او همدارنګه موټرو او ودانیو ته زیان اوښتی دی.

د «المسیره» په نوم د حوثیانو تلویزوني شبکې هم د یمن هیواد په المحویت ولایت کې د دوی تر کنترول لاندې سیمه کې د عربي ائتلافي ځواکونو د برید خبر ورکړی دی. د فرانسې خبري آژانس په دې اړه رپوټ ورکړی دی چې د دې برید په جریان کې د یوې ښځې او یوه ماشوم په ګډون دری تنه وژل شوي او شپږ نور ټپیان شوي دي.

د حوثیانو او د سعودي عربستان په مشرۍ پوځي ائتلاف ترمنځ متقابل بریدونه په داسې یو وخت کې زیاتیږي چې د ایران د بهرنیو چارو وزیر حسین امیر عبداللهیان درې تنه ایراني دیپلوماتانو ته د ویزو د ورکړې په برخه کې د سعودي عربستان د موافقې کولو خبر ورکړی دی. هغه وویل چې ټاکل شوې ده دغه کسان «د اسلامي سازمان په کنفرانس کې د دیپلوماتانو په توګه په جده کې خپل کار پيل کړي.»

د تشنج له زیاتیدو سره مهاله د عراق او عمان هیوادونو په منځګړیتوب د ایران او سعودي عربستان ترمنځ دیپلوماتیک مذاکرات دوام لري.

حسین امیرعبداللهیان چې د پنجشنبې په ورځ یې له خپل عراقي سیال سره په یوه خبري کنفرانس کې خبرې کولې وویل: «د تهران او ریاض اړیکو عادي حالت ته راوستلو او سوء تفاهم د لمنځه وړلو په خاطر د عراق د حکومت له هڅو څخه مننه کوم.»

د رویټرز د لیکنې په حواله د سیمې د دوو قدرتمندو هیوادونو د مناسباتو عادي حالت ته راتګ کیدای شي په یمن کې د تشنج له کمیدو سره ډيره مرسته وکړي.

د ایران له ملاتړ څخه د برخمنو حوثیانو او سعودي عربستان چې د نړیوالې ټولنې له ملاتړ څخه برخمن د یمن د قانوني حکومت حمایت کوي. د دوی ترمنځ د کلونو راهیسې نیابتي جګړه روانه ده، داسې جګړه چې د ملګرو ملتونو سازمان «د نړۍ تر ټولو خراب بشري ناورین» بللی دی.

آژانسونه: ش.ن. خ.ح