په ډهلي کې چاودنه؛ پولیسو په کشمیر کې څو شکمن کسان نیولي

د هند امنیتي چارواکو د کشمیر په شخړیزه سیمه کې په نوي ډهلي کې د دې اونۍ د چاودنې په ارتباط څو شکمن کسان نیولي دي. په دغه چاودنه کې ۱۲ کسانو خپل ژوند له لاسه ورکړی دی.

دغه چاودنه په نوي ډهلي کې د لال قلعه یا سره کلا مخې ته په یوه موټر کې رامنځته شوې وه چې له کبله یې په شاوخوا کې نورو موټرو او ریکشاګانو هم اور اخیستی و.

چارواکو د سې شنبې په ورځ اعلان وکړ چې دغه چاودنه د یوه احتمالي ترهګریز اقدام په توګه بررسي کوي. له ترهګرۍ سره د مبارزې قانون پر اساس د یوې قضیې ارزونه چارواکو ته د شکمنو کسانو د نیولو په برخه کې لا زیات اختیارات ورکوي.

تر اوسه پورې ترلاسه شوي معلومات

پولیسو د چهارشنبې ورځې په لومړیو ساعتونو کې د شپنیو عملیاتو په ترڅ کې د هند تر کنترول لاندې د کشمیر په پلواما سیمه کې پنځه کسان د پوښتنو او ګریږدنو له پاره ونیول.

مخکې تر دې په کشمیر کې پولیسو ویلي ول چې د وسله والو کسانو یوه هسته یې چې د کشمیر له شخړیزې سیمې څخه یې د نوي ډهلي تر اطرافو پورې فعالیت کولو لمنځه وړې ده.

چارواکو ویلي دي چې نوي ډهلي ته نږدې د هارینا ایالت په فرید آباد ښار کې یې اووه کسان، له دې ډلې دوه داکتران نیولي دي او پولیسو وسلې او په ډېره پيمانه بم جوړونکي مواد ضبط کړي دي.

هندي رسنۍ وایي چې کیدای شي دغه چاودنه هم له همدې هستې سره ارتباط ولري، خو پولیسو د دې له پاره چې تحقیقات جریان لري په دې اړه څه نه دي ویلي.

په ښارونو کې د امنیتي تدابیرو ډیریدل

له دې خونړۍ چاودنې وروسته د هند په لویو ښارونو، هوایي ډګرونو او د اورګاډي په تمځایونو کې امنیتي تدابیر زیات کړای شوي دي.

لال قلعه د هند یو له تاریخي ځایونو څخه دی چې سیلانیان ځانته را جلبوي. دغه کلا هغه ځای دی چې د هند لومړي وزیران هر کال د اګست پر ۱۵ دلته د آزادۍ ورځې په مناسبت وینا کوي.

په ۲۰۰۰م کال کې وسله والو په لال قلعه کې د هندي پوځ پر یوې پوستې برید وکړ او لږ تر لږه ۳ کسان یې ووژل. په پاکستان کې د لشکر طیبه ډلې د دې برید مسئولیت پر غاړه اخیستی و.

هندي ځواکونه د ۲۰۰۳م کال په دسمبر کې له دې کلا څخه ووتل او دغه کلا وروسته له هغې د سیاحت وزارت ته وسپارل شوه.