هند او پاکستان وايي اوربند یې عملي کړی
۱۴۰۴ اردیبهشت ۲۲, دوشنبه
د رويترز خبري آژانس په حواله په اتومي وسلو سمبال ګاونډيو هېوادونو د پوځي عملياتو مشران به نن، دوشنبه (د ۲۰۲۵م کال د می ۱۲مه) تر اوربند وروسته د راتلونکي د اقداماتو په اړه خبرې اترې وکړي.
د شنبې د ورځې اوربند د څلورو ورځو تر شديدو متقابلو ډزو، ديپلوماتيکي هلو ځلو او د امريکا متحده ايالاتو د حکومت تر فشار وروسته رامنځته شو چې د امريکا ولسمشر دونالد ترمپ، اعلان کړ.
اړونده موضوع: د هند او پاکستان شخړه: دواړه هیوادونه د بریا ادعا کوي
يوه لوړپوړي پوځي افسر وویل چې د هند پوځ د يکشنبې په ورځ پاکستان ته استول شوي پېغام کې د تېرو ورځو د اوربند د سرغړونو يادونه وکړه او د نوي ډيلي د حکومت دا اراده یې روښانه کړه چې پر دې ډول راتلونکو پېښو به غبرګون ښوول کيږي.
د پاکستان د پوځ وياند د هر ډول سرغړونو خبره رد کړه.
د رويترز په حواله د اوربند د لومړنيو سرغړونو وروسته تېره شپه د هيڅ ډول چاودنې او يا توغندي د توغول کيدو خبر نه دی رسېدلی.
د هند پوځ: «په ټوله کې شپه آرامه وه»
د فرانسې خبري آژانس په حواله تېره شپه د هند او پاکستان ترمنځ پر سرحد وضعيت آرام وو. د هند پوځ د دوشنبې په ورځ وويل تر تېرو شپو وروسته بيګا شپه لومړۍ آرامه شپه وو چې له يوه غیر متوقع اوربند وروسته یې امکان پيدا کړ.
د هند د پوځ له خوا په جاري کړل شوې اعلاميه کې راغلي: «د هيڅ ډول پېښې خبر نه دی ورکړل شوی.»
زياته شوې: «دا په پرله پسې دویم ځل وو چې په پونچ کې چې د هند تر ولکې لاندې کشمير سرحدي سيمه ده، هیڅ ډزې نه دي شوي.»
اړونده موضوع: د هند او پاکستان ترمنځ تازه نښتې؛ امریکا د منځګړیتوب هڅه کوي
پونچ، د هند تر ادارې لاندې کشمير هغه سیمه ده چې تر ټولو ډېره اغیزمنه شوې او لږ تر لږه ۱۲ کسان پکې وژل شوي او د ۶۰ زره نفوس لرونکې دې سيمې زياترو اوسيدونکو خپل کورونه پرېښې ول. د يکشنبې په ورځ ځيني خلک بیرته خپلو کورونو ته ر استانه شول خو ډېرو یې دا انديښنه درلودله چې اوربند ښايي دوام ونه کړي.
د چهارشنبې ورځې راهېسې روانو متقابلو ډزو وروسته د شنبې په ورځ هند او پاکستان پر اوربند سلا شول او د يکشنبې په ورځ د دواړو هېوادونو د پوځونو وياندويانو د مطبوعاتي غونډو په ترڅ کې جزيات شريک کړل.
د هند د پوځ بیان
د هند د پوځي عمليات مشر جنرال راجيو ګهي، وويل: «د سيندور تر عملياتو وروسته د پاکستان د پوځي عملياتو له مشر سره د تماس نيولو هڅه وشوه څو هغه ته د ترهګرۍ ضد اقداماتو په اړه معلومات ورکړل شي خو هغه زموږ غوښتنه رد کړه.»
جنرال راجيو ګهي، ادعا وکړه چې د سيندور عملياتو په ترڅ «مو د ترهګرو پر ۹ مرکزونو د بريدونو په ترڅ کې تر سلو ډېر ترهګر وژلي چې د يوسف اظهر، عبدالملک روف، او مدثر احمد، په څېر د لوړ ارزښت اهداف هم پکې شامل دي.»
اړونده موضوع: هند د آي پي ال سيالۍ د يوې اوونۍ له پاره ځنډولي دي
په دې مطبوعاتي غونډه کې د هند د هوايي ځواک مشر ای کې بهارتي، د سيندور د عملياتو په ترڅ کې د بهاولپور او مريدکې په ګډون پر يو شمیر سيمو د بريدونو په اړه معلومات ورکړل.
د يوه خبريال له لوري د رفال الوتکې «را اچول کيدو» په اړه پوښتنې په ځواب کې بهارتي، وويل: «موږ د جګړې په حالت کې يو. زيانونه د جګړې برخه دي. زه غواړم له تاسې دا پوښتنه وکړم چې آیا موږ هدفونه ترلاسه کړل؟ آيا موږ د ترهګرو د مرکزونو د له منځه وړولو هدف ترلاسه کړ؟ د دې پوښتنو ځواب هو دی.»
د دې پوښتنې په ځواب کې چې آيا هند د پاکستان الوتکې ويشتلي او غورځولي، نوموړي وويل: «موږ خپلې خاورې ته د دوی د الوتکو د داخليدو مخه نیولې. موږ سره یې پاتې شوني نه شته.»
د پاکستان پوځ څه ويلي؟
يکشنبې د شپې د پاکستان پوځ د عامه اړيکو د ادارې مشر جنرال احمد شریف، ادعا وکړه چې پاکستان په دوو ځایونو کې د هند د اس ۴۰۰ میزايلونو د بيترۍ سیستمونه په برياليتوب سره هدف وګرځول.
نوموړي وويل: «د پاکستان پر ضد کاريدونکې ۲۶ مهمې پوځي اډې په نخښه کړل شوي.»
د مطبوعاتي کنفرانس په ترڅ کې د پاکستان د سمندري ځواک مرستيال مشر رب نواز، وويل د پاکستان سمندري ځواکونو ټول بندرونه فعال وساتل او د هند الوتکه د پاکستان له سمندري سرحد څخه ډېره لېرې وه.
اړونده موضوع: د هند او پاکستان د ملي امنيت د مشاورينو ترمنځ د اړيکې نیولو خبرونه
د پاکستان د پوځ وياند جنرال احمد شريف، وويل چې پاکستان له لوري د هند د کوم پېلوټ د نیولو خبر يوازې تر ټولنیزو رسنيو محدود دی. هغه وويل: «زه دا روښانه کوم چې له پاکستان سره هیڅ هندی پېلوټ نشته.»
جنرال احمد شريف، ادعا وکړه چې د اوربند غوښتنه پاکستان نه وه کړې بلکې د اوربند هيله د هند له خوا څرګنده شوې وه.
هغه وويل چې د کنترول پر کرښه د اوربند پر خپله ژمنه کلک ولاړ خو «که چېرې مخالف لوری له اوربند سرغړونه وکړي نو ځواب به ورکړو او زموږ ځواب به شديد وي.»