رنګین تابوتونه؛ په ګانا کې د جنازې او تدفین عجیبه دود

د ګانا خلک خپل مړي په خارق العاده طراحي شوو تابوتونو کې ږدي. دغو تابوتونو ته د سيمې ژبه «ایبو» وايي چې په تحت الفظي معنی مشهور «ضرب المثل» دی. دا کلتور په اصل کې په آکرا کې د «ګا» قومي ډلې دی چې نورو هم منلی او پکې رایج شوی دی.

کله چې یوه کورنۍ خپل یو غړی له لاسه ورکوي، هغوی راټوليږي او تصمیم نیسي چې څنګه د هغه د جنازې او تدفین مراسم ونیسي. ځینې د یو تابوت د رانیولو له پاره د نجارۍ دوکان ته ځي او ځینې بیا د خپل مړي د نوم او یادښت له پاره مشورې کوي. د بېلګې په توګه يو کب پلورنکی د کب په څېر تابوت کې دفن کيږي.

د زمري په بڼه تابوتونه یوازې د مشرانو او با نفوذه افرادو له پاره په نظر کې نیول کيږي، ځکه زمری د قدرت سمبول ګڼل کيږي. د ګانا جهوريت پلازمېنې آکرا ته څېرمه په لابادي کې سلطنتي کورنۍ بیا د چرګ په ډيزاین تابوت کاروي چې دا د دوی د کورنۍ پورې منحصر ‌ډيزاین دی. د تابوتونو انتخاب په خپله خوښه نه دي بلکې د افرادو له هویت، کار او ټولنیز مقام سره تړلی دی.

د یو تابوت جوړول شاوخوا دوه اوونۍ وخت نیسي. بیې ېې له شاوخوا ۷۰۰ ډالرو شروع کيږي. کیفیت ېې د کارول شوي لرګي له نوعیت سره تړاو لري. اریک کپاکپو ادوتي د تزئيني تابوتونو په جوړولو کې تخصص لري. هغه اسوشتید پریس خبري آژانس ته وویل: «خلک د یوې شيبې له پاره حتی هېروي چې د تابوت په منځ کې څوک دی. د هغوی پام تابوت ته اوړي او دې سره فضا تغییر کوي.»

په ګانا کې د جنازې مراسم د خلکو په شور او ګڼې ګوڼې سره ترسره کیږي، په ځانګړې توګه چې تابوت ېې په ځانګړي ډيزاین وي. خلک تر ډېره د تابوت د نوعیت او د هغه د تخیلي ډیزاین تر اغیز لاندې راځي. په دا ډول مراسمو کې خفګان او ماتم پر شور او هلهلې اړوي.

خلک د مړي خښولو ته خپلو خپلوانو ته درناوي وړاندې کولو د وروستي فرصت په سترګه ګوري. دوی د مراسم د بهتره کولو له پاره له شته ټولو امکاناتو استفاده کوي چې پکې موسیقي، نڅا او نور دودیزو نمایشونو راځي. تابوت د مړي د کورنۍ له پاره يوازې يو ابدي ځای نه دی. دا هغه داستان دی چې د تابوت پر لرګي حک شوی او داسې یو متل چې بايد ولوستل شي.