یوناني چارواکي: جولای د ريکارډ په کچه ګرمه میاشت وه
۱۴۰۳ مرداد ۱۵, دوشنبه
یوناني چارواکو د دوشنبې په ورځ (د ۲۰۲۴م کال د اګست ۵مه) وویل چې په دغه مدیترانه يی هېواد کې د حرارت درجه د ۱۹۶۰ او ۲۰۲۴ کلونو ترمنځ په اوسط ډول تر دوه نیمې درجې لوړه شوې ده.
د فرانسې خبري آژانس په حواله، دغې ادارې ويلي دغه هېواد د تېرو ۸۰ کلونو په جریان کې درې تر ټولو ګرمې د جولای میاشتې درلودلې چې درې واړه ېې په وروستيو څلورو کلونو کې وې.
په یونان کې د ګرمې هوا مخکنی ريکارډ په ۲۰۱۲ کې ثبت شوی وو. په جولای کې د حرارت ۰،۳ درجې په لوړېدو سره یاد ریکارډ مات شو.
سرچېنې ويلي: «د هواپېژندنې ادارې د لومړنیو معلوماتو پر اساس، د ۲۰۲۴م کال جولای، په یونان کې تر ټولو ګرمه میاشت ثبت شوې وه.»
د اروپايي اتحاديې د هواپېژندنې ادارې تېره میاشت وویل چې د جولای ۲۱مه د نړۍ په سطحه تر ټولو ګرمه ثبت شوې ورځ وه.
د اقلیمی بدلون ادارې هم ويلي چې د سږکال جولای ۲۱مه له ۱۹۴۰ راهیسې د حرارت تر ټولو ګرمه (د فارنهایت ۶۲.۷ درجې) بت شوې درجه ده.
زیاته شوې چې سږکال په یونان کې جون هم له ۱۹۶۰ راهیسې تر ټولو ګرمه د جون میاشت وه.
(AFP)mks/aa/