په کابل کي بيا ځانمرګي بريدونه وشول | افغانستان | DW | 19.08.2011
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

په کابل کي بيا ځانمرګي بريدونه وشول

په داسي حال کي چي افغانستان د خپلي خپلواکي 92 کاليزه لمانځي، په پلازمينه کابل کي د بريتانيا په فرهنګي مرکز، بريتش کونسل، باندي د ځانمرګي بريدونو سره د لومړي رپوټونو له مخي لږ تر لږه ۸ تنه وژل شوي

ځانمرګی برید په افغانستان کی (ارشیف)

ځانمرګی برید په افغانستان کی (ارشیف)

د پوليس د چارواکو په وينا نن سهار طالب اورپکو په کابل کې د بريتانيا د فرهنګي مرکزپر ودانيو بريد کړي چې په پايله کې لږ تر لږه ۸ تنه وژل شوي دي . وسله والو طالبانو د بريد پړه پر غاړه اخيستي.

بريتش کونسل د بريتانا يو رسمي مؤسسه ده چي هدف په ټوله نړي کي د بريتانیا د ژبني او فرهنګي فعاليتونو لمن پراخول دي.

پوليس وايي چي لږ تر لږه لومړي دوه حملي د ځانمګري بريد کونکو کار دي. د افغانستان د کورنيو چارو د وزارت وياند، صديق صديقي وويل: اته تنه وژل شوي چي ډيري پوليس دي او لس تنه نور ټپيان شوي دي. دا لومړي معلومات دي او پيښه تر پلټني لاندي ده.»


د کابل د جنايي څيړنو مشر، محمد ظاهر، ويلي چې يو بريد کوونکي تر اوسه د د فرهنګي مرکز په انګړ کې د افغان امنيتي ځواکونو سره په جګړه بوخت دي. هغه زياته کړې چې نور شپږ تنه ملکي وګړي په پيښه کې ټپيان شوي دي.

د کابل د پوليس وياند، حشمت الله ستانکزي، ويلي چې د لمړۍ چاودنې څخه تقريبا دوه ساعته وروسته دغه ځايې ته څيرمه يو بله درنه چاودنه هم اوريدل شوي ده.

په کابل کې د ناټو ځواکونو او د بريتانيا سفارت هم پيښه تايد کړې ده.


د رويټرز تلويزون له خوا په خپرو شوو انځورونو کې په کوم سړک چې د بريټانيا فرهنګي مرکز پروت دي لرګي او اوسپني په سړک کي خورې ورې ښودل شوي. د غه سيمه د افغان امنيتي ځواکونو له خوا کلابند شوې.

د طالبانو وياند، ذبيح الله مجاهد، رويټرز خبري اژانس ته د يو نامعلوم ځايې څخه د تليفون په کرښه ويلي : « مونږه د انګلستان فرهنګي مرکز او د ملګرو ملتونو دفترونه په نښه کړي.» خو دا يې ونه ويل چې طالبانو دغه سيمي ته څومره بريدکوؤنکي ليږلې دي. خو د ملګرو ملتو يو وياند د هغه دا ادعا رده کړي او وويل چي د ملګرو ملتو دفرتونه په دي حملو کي هدف نه دي نيول شوي.

دا پيښه په داسي وخت رامنځ ته کيږي چې نن افغانستان د انګلستان څخه د خپلې خپلواکۍ جشن لمانځي. دا پيښه د بهرنيو ځواکونو څخه افغان ځواکونو ته د کابل ښار د امنيت د سپارلو څخه يوه مياشت وروسته رامنځ ته کيږي.

اژانسونه/ سيدرياض
کتونکي: عبدالباري حکيم

DW.COM