په اسرائیل کې د اسلام د لومړۍ دورې طلايي سکو خزانه موندل شوې
۱۳۹۹ شهریور ۶, پنجشنبه
اعلان
اسرائیلي لرغونپوهانو لیات نداو ژیو او ایلي حداد په یوه ګډه بیانیه کې ویلي دي چې ۴۲۵ سکې چې په بشپړه توګه د سرو زرو دي ۱۱۰۰ کاله پخوا د عباسي دورې ته ورګرځي چې په خبره یې دغه ډول سکې په ډیر ندرت سره موندل کیږي.
له دغه خزانې سره د سرو زرو په سونو کوچنۍ ټوټې هم موندل شوي دي چې اټکل کیږي هغه به هم د سکو په څیر د راکړې ورکړې له پاره استعمالیدې.
د سکو لرغون پیژوندونکي روبرت کول، ویلي دي چې لومړنۍ شننه ښيې چې دغه سکې د نهمې پیړۍ دي چې د عباسي خلافت د اوج وخت انګیرل کیږي او په کابو ټول منځني ختیځ او شمالي افریقا یې کنترول لاره.
د دغو سکو کشف په اسرائیل کې د لرغونو سکو تر ټولو ستره خزانه ده چې موندل کیږي. په ۲۰۱۵م کال کې غوټه وهونکو د قیصریه ساحل ته څیرمه د سرو زرو ۲۰۰۰ سکې موندلې وې چې په لسمه او یوولسمه پيړۍ کې د فاطمیانو خلافت دورې وې.