يوې چينايي کښتۍ زيگنال کشف کړی دی | آلمان او نړۍ | DW | 05.04.2014
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

يوې چينايي کښتۍ زيگنال کشف کړی دی

یوه چینایي بیړۍ چې د مالیزیا د ورکې شوې الوتکې د پلټنو په عملیاتو کې برخه لري یو زیگنال کشف کړی دی. خو دا خبره لا څرگنده نه ده، چې آیا دا به د ورکې شوي الوتکې د «بلېک بوکس» د زیگنال څپي وي که نه.

د چین دولتي خبري آژانس «شین هوا» د شنبې په ورځ (۲۰۱۴کال د اپریل میاشتي ۵) خبر ورکړی دی دغه زیگنال د چین د هایکسون 01، نومې بیړۍ کشف کړی دی، کومه چې د ورکي شوي مالیزیایي الوتکې پسې د پلټنو په عملیاتو کې برخه لري. دغه عملیات د هند د سمندر په سویلي برخه کې ادامه لري.

د نوموړي خبري آژانس د رپوټ له مخې دغه زیگنال د سویلي عرض البلد په ۲۵ درجو او د ختیځ طوالبلد په ۱۰۱ درجو کې کشف شوی دی چې فریکونسي یې ۳۷،۵ کیلوهیرتڅه ده.

د چین دولتي تلویزون ویلي دي چې دا خبره لا تر اوسه نامعلومه نه ده چې دغه زیگنال به د مالیزیا د تري تم شوي الوتکې د «بلېک بوکس» وي او که نه. دغه الوتکه د مارچ میاشتې له اتمې نیټې راهیسې چې پکښې ۲۳۹ تنه سپاره ول، ورکه ده. ورکه شوې الوتکه د مالیزیا له پلازمېني کوالالمپور څخه د پېکینگ پر لور الوتې وه.

د آسترالیا حکومت چې د الوتکې د پلټني د عملیاتو همغږي کوي، لا تر اوسه په دې اړه کومه تبصره نه ده کړې.

د مالیزیايي چارواکي د سټلایټونو له خوا د ورکړل شوو ارزونو پر مټ په دې باور دي، چې دغه الوتکه د خپل اصل خط سير تر بدلولو وروسته د آسترالیا تر لویدیځ ساحل ډیر وړاندې د هند په سمندر کې نسکوره شوې ده.