مهاجرین اروپا ته له کومو لارو ځانونه رسوي؟ | اروپا ته مهاجرت | DW | 25.03.2018
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

اروپا ته مهاجرت

مهاجرین اروپا ته له کومو لارو ځانونه رسوي؟

په اوسنیو شرایطو کې مهاجرین د بوسنیا له لارې د بالکان له هیوادونو څخه په تیریدو ځانونه غربي اروپا ته رسوي. په ۲۰۱۵م کال کې د مهاجرینو د کړکیچ پرمهال شاوخوا لس لکه مهاجرین اروپا ته داخل شوي وو.

په منځني ختیځ کې د جګړو او افریقايي هیوادونو کې د بې وزلۍ له امله سلګونو زرو مهاجرینو اروپا ته د رسیدو له پاره د بالکان یا د یونان له شمال غرب څخه تیریدونکې لارې غوره کړې وې. تر دې وړاندې به ډیر شمیر مهاجرینو د بوسنیا له غرنیزو لارو په تیریدو سره د سریبیا له لارې ځانونه د اروپايي ټولنې غړو هیوادونو ته رسول. خو د ۲۰۱۶م کال د مارچ میاشتې راهیسې د دغې لارې تر بندیدو وروسته، مهاجرینو د نورو لارو په پیدا کولو پیل کړی. دوی اوسمهال د البانیا او مونټي نیګرو له لارې ځانونه بوسنیا ته رسوي او بیا له هغه ځایه ځانونه اروپا ته رسوي.

په غرب کې د دپلوماتیکو سرچینو په حواله دغه لار معمولاً د ناقانونه وسلو او د نشيي توکو قاچاقبران کاروي. د سرچینو په حواله د مهاجرینو دغه تازه لار، د دې ښکارندويي کوي چې د ناقانونه وسلو او د نشيي توکو د قاچاق کوونکو له د انساني قاچاقبرانو له شبکو سره اړیکې رامنځ ته شوي دي.

د بوسنیا په سرایوو سیمه کې یو سوریايي مهاجر احمد وسیم د فرانسې خبري آژانس ته ویلي چې له ترکیې څخه البانیا ته د رسیدو له پاره هغه انساني قاچاقبرانو ته ۲۰۰۰ امریکايي ډالر ورکړي.

په ورته وخت کې د بوسنیا هیواد د مهاجرت د ادارې د چارواکو په حواله د روان کال له پیل نه تر اوسه پورې ۷۰۰ مهاجرین دې هیواد ته په ناقانونه توګه داخل شوي او د شاوخوا ۸۰۰ نورو مهاجرینو د داخلیدو مخنیوی یې کړی دی.

دغو چارواکو په دې هکله زیاته کړې چې په دې مهاجرینو کې زیاتره یې د سوریې، لیبیا، پاکستان او افغانستان اتباع شامل دي. دوی همدا راز ویره لري چې د اوړي د موسم په رارسیدو سره به د ناقانونه مهاجرینو د تګ راتګ کچه هم لوړه شي.

د فرانسې د خبري آژانس په حواله د بوسینا په سرایوو کمپ کې د خراب وضعیت او د وسائلو د نه شتون له امله اوسمهال په دې کمپ کې یوازې ۱۵۴ مهاجرین ساتل کیږي.

دا په داسې حال کې ده چې د بوسنیا د امنیت وزیر ډراګان میکټک بیا د وضعیت د لا خربوالي اعتراف کړی او ویلي یې دي چې د یونان او بوسنیا په پوله شاوخووا ۵۰ زره مهاجرین موجود دي چې غواړي د بوسنیا له لارې غربي اروپايي هیوادونو ته ځانونه ورسوي.

پر ورته موضوع یو انځوریز البوم زموږ له آرشیف څخه:

DW.COM