له آلمانه د افغان مهاجرو پر پلان شوي اخراج نیوکي | اروپا ته مهاجرت | DW | 04.12.2018
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

اروپا ته مهاجرت

له آلمانه د افغان مهاجرو پر پلان شوي اخراج نیوکي

په آلمان کې د مهاجرو د حقونو مدافع سازمان «پرو ازول» له آلمان څخه کابل ته د افغان مهاجرو پر پلان شوي اخراج نیوکي کړي دي.

په آلمان کې د کډوالو د حقونو مدافع سازمان «پرو ازول» مشر ګونتر بورخارد، د فرانسې خبري آژانس سره په مرکه کې وویل: «دا بی مسئولیتي ده چې پناه غوښتونکي بیرته افغانستان ته اخراج شي، داسې یو هیواد ته چې په مخ پر ډیریدونکي ډول له ویجاړیدو سره مخامخ دی».

د آلمان چارواکو پتېيلې ده چې نن د سه شنبې په ورځ (۲۰۱۸م کال د ډسمبر ۴مه) ډيوه ډله افغان مهاجر کابل ته اخراج کړي.

د آلماني چارواکو په حواله تر ټولو لومړی هغه پناه غوښتونکي به په الوتکه کې افغانستان ته اخراج شي چې جرم یې کړی وي. خو بورخارد، انتقاد کوي چې «په دې برخه کې حتی دا هم واضحه شوې نه ده چې اصلاً څوک مجرم دی».

د آلمان د ایالتونو د کورنیو چارو وزیرانو په کنفرانس وزیران ونه توانیدل چې حتی په ګډو معیارونو سره موافقې ته ورسیږي. په دې توګه نو دا هم روښانه نه ده چې ډیر هغه مهاجر چې کوچني جرمونه يې کړي وي، اخراجیدو ته تیار وي.

په آلمان کې د مهاجرو د حقونو مدافع سازمان مشر د هیسن د راتلونکي ایالتي حکومت او په ځانګړي توګه له زرغون ګوند څخه په دې برخه کې د واضح مقرراتو غوښتنه وکړه: ښاغلي بورخارد وویل: «حکومت باید واضح کړي چې هغو سیمو ته چې جګړه پکې روانه ده اخراج وشي».