ترکیه او روسیه په دفاعي برخه کې لا زیات نږدې کیږي | آلمان او نړۍ | DW | 19.05.2019
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

آلمان او نړۍ

ترکیه او روسیه په دفاعي برخه کې لا زیات نږدې کیږي

د ناټو د غړو هیوادونو ترکیي او امریکا ترمنځ د «اس-۴۰۰» ډوله توغندیو سیستم د خریدارۍ په هکله لانجه لا پای ته نه ده رسیدلې، چې ترکیې له روسیي سره په ګډه د «اس-۵۰۰» نویو توغنديو د جوړولو خبره کړې ده.

د ترکيي ولسمشر رجب طیب اردوغان ویلي دي چې ترکیه او روسیه به په ګډه «اس-۵۰۰» ډوله توغندیو دفاعي سیستم جوړ کړي. د ترکیي ولسمشر د شنبې په ورځ په استانبول کې ځوانانو ته د خپلې وینا پر مهال وویل: «هیڅ امکان نه لري چې د اس-۴۰۰ډوله توغندیو دفاعي سیستم له معاملې څخه دې پر شاتګ وشي.» د اردوغان په خبره د دې معاملې تر بشپړیدو وروسته به د اس-۵۰۰ ډوله توغندیو پر جوړولو ګډ کار پيل شي.

دا خبره مهمه ده چې امریکا متحده ایالات د ترکیي له خوا له روسیي څخه د اس-۴۰۰ ډوله توغندیو دفاعي سیستم پر خریدارۍ سخت اندیښمن دي. د واشنګټن چارواکي اندیښنه لري چې که روسیه دغه سیستم ترکیي ته ورکړي، نو روسیه کولی شي د توغندیو د دې دفاعي سیستم له طریقه د شمالي انتلانتیک دفاعي سازمان (ناټو) جاسوسي وکړي.

همدا دليل دی چې د ناټو د دغو غړو هیوادونو (امریکا او ترکیي) ترمنځ پر دې معاملې ترینګلتیا مخ پر ډیریدو ده. د امریکا له خوا د سوریایي کردي ملیشو ملاتړ هم د دواړو هیوادونو ترمنځ د اختلاف یو بل ټکې دی.

د امریکا له خوا داسې اندیښنه هم ښوول شوې وه چې د اس-۴۰۰ ډوله توغندیو دفاعي سیستم د امریکا له اف ۳۵، ډوله جنګي الوتکو سره همغږی نه دی. د ترکیي ولسمشر د شنبې په ورځ په دې اړه د امریکا د انديښنو په غبرګون کې وویل چې ترکي چارواکو په دې اړه تخنیکي څیړنې کړې دي او داسې کومه ستونزه یي نه ده موندلې.

د یادونې وړ ده چې ترکیه له امریکا څخه اف ۳۵، ډوله جنګي الوتکې پيري، خو له روسي سره د اس-۴۰۰ ډوله توغندیو دفاعي سیستم د معاملې له کبله امریکا له ترکیي سره د دغه ډول جنګي الوتکو د پلورلو قرارداد د ځنډولو ګواښ کړی دی.

یو شمیر ترکي پیلوټان په دې ورځو کې په امریکا کې دي او د اف ۳۵، ډوله جنګي الوتکې د پرواز په برخه روزنه ترلاسه کوي. اردوغان زیاته کړې: تمه ده چې له روسيي څخه به د توغندیو دفاعي سیستم د جولای په میاشت کې او یا کیدای شي تر هغې مخکې ترلاسه کړي.

دویچه ویله/ ش. ن/ س.ر

اعلان