امريکا هغه مهاجر اخراجوي چې په کرونا ويروس اخته وي | آلمان او نړۍ | DW | 23.05.2020
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

آلمان او نړۍ

امريکا هغه مهاجر اخراجوي چې په کرونا ويروس اخته وي

د امريکا متحده آیالاتو سفرونه ډېر محدود کړي‌ دي.‌ له دغه هېواده وتل ممکن دي. خو لاتيني امريکا ته اخراجونه هم دوام لري‌ چې ډېر شمېر اخراج شوي کډوال پکې د کوويد-۱۹ ناروغي لري.‌

د کرونا ويروس خپرېدنه لا په متحده آيالاتو کې دوام لري.‌ د مړو شمېر يې اوس ۹۰ زرو ته رسېدلی چې په نړۍ کې تر ټولو لوړ شمېر دی.‌ ولسمشر ترمپ متحده آيالاتو ته د سفر کلک محدوديتونه او د کډوالۍ ضد مقررات پلي کړي‌ دي. خو د لاتينې امريکې او کرابين په لور تر اوسه لا هغه الوتنې دوام لري چې مهاجر پکې اخراجيږي.‌ په سپرليو کې يې ډېر دغسې کسان هم موجود دي چې د کرونا په ويروس اخته وي.‌

منتقدين وايي‌ چې متحده آیالات په دې ترتيب په هغو هېوادونو کې اوس دغه ويروس خپروي چې د روغتيا سيستمونه يې له دغې وبا سره وړ چلن نه شي کولی. هايتي مثلا داسې يو هېواد دی چې ۱۱ ميليونه وګړي، خو يوازې ۶۰ تنفسي‌ آلې لري. د «مائيمي هېرلډ»‌ ورځپاڼې د يوه رپوټ تر خپرېدو وروسته پنځه تنه هايتيان چې د کرونا تېست يې مثبت ختلی وو، د خپل ټاټوبي په لور اخراج نه شول.

«د متحده آيالاتو حکومت ختماً د کوويد- ۱۹ وبا د شيوع يو برخه مسئوليت پر غاړه لري»، دغه خبره آريانا سويار چې د بشري حقونو د څارډلې د متحده آيالاتو د څانګې د کډوالۍ د چارو کارپوهه ده،‌ دويچه ويله ته ليکلې ده. د هغې په خبره «پر سفرونو د نړيوالو محدوديتونو او د روغتيا د چارو د کارپوهانو د سپارښتنو خلاف د کډوالۍ ادارې آی سي‌ اي هغه کسان اخراج کړي دي چې د ويروس د ازمايښت نتيجه يې مثبته وه.»

«د امريکا د لويې وچې ووهان»

يو دغسې هېواد چې د اخراجونو د لړۍ د پايلو سره مبارزه کوي، ګواتېمالا ده.‌ د دغه هېواد د روغتیا وزير،‌ هوګو مونروی، وايي‌ چې ۵۰ تر ۷۰ سلنه اخراج شوي کسان د کرونا ويروس هم لري. نوموړی زياتوي چې د متحده آيالاتو اخراجي الوتنې د هغه په هېواد کې د کرونا کړکېچ لا پسې زياتوي. نوموړي متحده آيالات «د امريکا د لويې وچې ووهان» وبلل.‌ ووهان د چين هغه ولايت دی چې د کرونا ويروس پکې په لومړي ځل وليدل او بيا له هغه ځايه په ټوله نړۍ کې خپور شو. د متحده آيالاتو د دموکرات ګوند ځينو سناتورانو، د ولسمشرۍ د پخوانيو نوماندانو، برني سنډرز او اليزابېت وارن په شمول،‌ د ترمپ حکومت ته يو پرانيستی ليک امضا کړی او لېږلی دی. په دغه ليک کې غوښتنه شوې چې هغه کډوال چې اخراجيږي بايد تر مخه د کوويد-۱۹ ازموينه وکړي. سناتورانو د بهرنيو چارو وزير، مايک پومپيو ته په خپل دغه ليک کې کښلي دي چې «د هغو کسانو چې کوويد-۱۹ لري، په اجباري ډول اخراجول له هغو بشري او روغتيايي‌ معيارونو څخه سرغړونه ده چې زموږ ملت يې بايد د وبا پر مهال مراعات کړي.»

کارلا بلايکر/ ن ص/ا ا

اعلان