څرنگه کولای سو په بريا سره خپلو موخو ته ورسيږو؟

هر څومره چي زموږ پريکړي مبهمي او دقيقي نه وي، په هغه اندازه پکښې زموږ د بريا احتمال کميږي. د بېلگې په توگه که يو څوک وغواړي څو کيلو وزن کم کړي، داسي بايد ونه کړو چي ووایو «په نوي کال کي به هره ورځ د وزن کمولو له پاره کلب ته ځم»، بلکي موخه بايد دا وي چي حداقل «په اوونۍ کي يو وار کلب ته ځم».

ارواپوهان توصيه کوي چي لومړی د خپلو ټاکلو موخو د گټو او ضرر په اړه ځان پوه کړئ. د بېلگې په توگه که غواړئ چي سگريت پريږدی، په لومړی سر کي خپل ځان ته د هغه چا له زاويې څخه وگورئ چي سگريت يې پرې ايښي وي. دغه تصور په انسان کي د ښه او مثبت حس سبب کيږي.

د کارپوهانو بله توصيه دا ده چي خپلي موخي په څرگندو ټکو پر کاغذ باندي وليکئ. که يو څوک پر کاغذ باندي خپله موخه وليکي او په کور کي يې هلته ځوړند کړي چي د ورځي څو واري يي ويني نو دوی به پوه وي چي نن بايد ورزش ته ولاړ سي. د خاطراتو کتابچه هم ښه مرسته کولای سي.

د کارپوهانو په خبره خپلي موخي بايد ځان ته يو دروند بار و نه گرځوو. د بېلگې په توگه که يو چا تر اوسه پوري دوه کيلومتره ځغاغستلي نه وي، بايد د ځغاستي په سيالۍ کي گډون و نه کړي، بلکي په اوونۍ کې دوه واري ځغاستل به د هغه له پاره ډېر ښه پيل وي. سړی بايد گام پر گام خپلي موخي ته ورسيږي.

کله چي مو د ښو کارونو کولو پريکړه وکړه، حتماً خپلي پريکړي له نورو سره شريکي کړئ. دا کار دوه امتيازه لري: له يوه اړخه مو دوستان په دغه لار کي ستاسو ملاتړ کوي او له بله اړخه تاسي نه سي کولای چي په راحتۍ سره اوږه ترې خالي کړئ. کارپوهان حتی توصيه کوي چي د خپلي انگېزې د پياوړتيا له پاره له ټولنيزو رسنيو کار واخلئ.

کله چي ځان ته هدف ټاکئ د هغه په منفي اړخونو نه بلکي مثبتو اړخونو باندي فکر وکړئ. دغه کار خپلو موخو ته له رسېدو سره مرسته کوي.