Серија силни земјотреси на Филипини

Првиот земјотрес со јачина од 5,4 степени според Рихтеровата скала се случил нешто по четири часот изутрина по локално време, во близина на градот Итбајат, на околу 700 километри северно од Манила. По околу три часа следувал втор земјотрес со јачина од 5,9 степени, чиј епицентар бил на околу 21 километри од Итбајат. Третиот потрес со јачина од 5,8 степени се случил пет часа по првиот, на островот Батан, кој е во близина на Итбајат.

Во земјотресите загинаа најмалку осум луѓе, а неколку десетици се повредени. Обемот на штетите засега не е познат. Мештаните велат дека во својот регион досега не почувствувале толку силни потреси на земјата. Повеќето од околу 3000 жители на Итбајат се евакуирани на отворено, поради можни нови потреси, а струјата е исклучена заради поголема безбедност.

Во силен земјотрес (7,1 степен според Рихтеровата скала) на Филипини вооктомври 2013 година, загинаа 220 луѓе. Филипини се наоѓа на т.н. Пацифички огнен појас, каде се случуваат околу 90 проценти од сите земјотреси во светот.