Олеснет влез за странски работници на германските аеродроми

Германската влада сака да му помогне на воздухопловството во надминувањето на проблемите со работници на аеродромите во земјата. Според денешните (29.06) најави од Берлин, на аеродромите ќе може да се вработуваат работници од странство кои ќе имаат временски ограничени договори за работа. Според сојузниот министер за сообраќај, Фолкер Висинг, тие би помагале во делот на подготовка на багажот и чекирање.

Висинг, заедно со колегите од Министерството за внатрешни работи, Ненси Фезер и од Министерството за труд, Хубертус Хајл, денеска одржа прес-конференција околу оваа тема. Тројцата министри потврдија дека работниците од странство ќе добиваат дозволи за работа на аеродромите по забрзана постапка. Истото важи и за дозволите за престој во земјата. Што се однесува до теснецот со работна сила на безбедносните контроли, помош би требало „евентуално“ да дојде од припадници на сојузната полиција.

Владата сака да го забрза темпото на целиот процес на вработување на аеродромите: „Сакаме да ја забрзаме постапката за да можат да дојдат“, изјави министерот Хајл. Работниците од странство ќе мора да бидат вработувани и плаќани согласно тарифните договори, а т.н. „позајмени работници“ нема да има. Освен тоа, работниците би требало да добијат „достоинствено сместување, а не да бидат собирани во некакви колиби“, рече Хајл, потенцирајќи дека владата нема да дозволи социјален дампинг. Работниците не мора да имаат доказ за познавање на германски јазик, затоа што не се работи за „трајно доселување во Германија“.

Министрите не наведоа термин од кога би почнале да доаѓаат странски работници. Браншата се надева на 1500 до 2000 работници, пред сѐ од Турција и балканските земји.

- повеќе: Можат ли „гастарбајтери“ да ги спасат германските аеродроми од хаос?

Многумина најверојатно ќе пристигнат најрано во август, односно предоцна за да бидат вистинска помош во време на летни одмори, рече Томас Рихтер, шеф на сојузот на работодавачи во делот на компании кои пружаат услуги на аеродромите (АБЛ). „Тоа не го решава проблемот, но сигурно е од помош“, оцени тој.