Макрон ја прифати оставката на Коломб

Францускиот претседател Емануел Макрон ја прифати оставката на министерот за внатрешни работи Жерар Коломб (насловна фотографија) откако претходно одби да го стори тоа. Коломб (71) во понеделникот понуди оставка која шефот на државата веднаш ја отфрли.

Во изјава за Фигаро, Коломб вчера попладне инсистираше на својата одлука да ја напушти владата.

Новинската агенција Франс прес наведува дека неизвесноста траела неколку часа додека претседателството конечно не ја прифатило оставката на министерот.

Емануел Макрон ја „прифати оставката на Жерар Коломб и го замоли премиерот (Едуар Филип) да ја извршува должноста министер за внатрешни работи до именување на наследникот“, изјавено е за новинската агенција Франс прес од Елисејската палата.

Коломб и порано најавуваше дека ќе го напушти министерското место по европските избори во 2019 година и оти ќе се кандидира за градоначалник на Лион.

Француската опозиција вчера коментираше дека околу понудената оставка на министерот се прави „циркус“.