Историски економски пад во Унгарија, Романија и Бугарија
14 август 2020
Официјалните податоци на трите земји-членки на ЕУ покажуваат драматичен пад на БДП- најголем од падот на комунизмот.
Унгарскиот БДП паднал за 14,5 проценти во вториот квартал во однос на првите три месеци од 2020 година. Падот во Романија е 12,3 проценти, а во Бугарија 9,8, покажуваат официјалните податоци.
Во Унгарија, кризата со коронавирусот влијаеше врз услужните дејности како и врз индустријата, соопшти бирото за национална статистика. Падот на БДП далеку ги надмина проценките на аналитичарите.
„Целта е унгарската економија да се врати на предкризниот пат што побрзо и повторно да постигне раст од околу 5 проценти следната година“, соопшти министерството за финансии.
На годишно ниво, прогнозата е дека Унгарија ќе има пад од 3 проценти на БДП, Романија- 3,8; а Бугарија- 7 проценти.
Во Романија и Бугарија, извозот падна за 18 односно 23,4 отсто во вториот квартал.
Романските власти се обидуваат да ја зголемат домашната потрошувачка, а една од мерките е зголемување на пензиите за 14 проценти од септември годинава.