Големи штети од еруптираниот вулкан на Ла Палма

На шпанскиот остров Ла Палма поради отворање на уште еден отвор на вулканот Кумбре Вијеха се евакуирани уште 500 луѓе со што вкупниот број на лица кои мораа да ги напуштат своите домови е зголемен на 6.000.

Појавата на уште еден отвор од кој избива лава во зоната Таканде во општината Ел Пасо доведе до евакуација на населението, напиша синоќа на Твитер службата за итна помош на островот.

Синоќа околу 500 лица мораа да ги напуштат своите домови, потврди денеска за агенцијата Франс прес Лорена Ермандес Лабрадор, официјално лице од соседното село Лос Лјанос де Ариадне, кое е силно погодено од излевање на лавата.

Вулканот на шпанскиот остров Ла Палма во Атланскиот океан во неделата се активираше по 7 дена сѐ посилни сеизмички активности.

Лава изби на ново место на вулканот Кубре Вијеха по еден потрес со магнитуда 4,1 забележан во 21.32 часот синоќа по локално време, наведе Вулканолошкиот институт на Канарските острови.

Избивањето на лавата од вулканот забавило утрината и лавата сѐ уште не стигнала до океанот, иако според првичните предвидувања требала да стигне уште ноќеска.

Вулканот исфрла столбови дим високи повеќе стотици метри и меѓу 8.000 и 10.500 тони сулфурен диоксид на ден, но сепак воздушниот простор не е затворен.

Фирмата Аена, која управува со шпанските аеродроми, вчера објави дека сите летови на аеродромот Ла Палма се извршени и оти за денеска се предвидени уште 48 лета.

Ова е прва ерупција на вулканот Кумбре Вијеха на овој остров со 85.000 жители од 1971 година. Иако во ерупцијата нема жртви таа предизвика голема штета, текот на лавата запали вегетација, ги прекри патиштата и уништи стотици куќи.