Гејмском: Игрите можат да почнат!

Оној кој отсекогаш сакал да учествува во илегални автотрки, но не може за таа прилика да се облече како сака, сега може и тоа: во новото издание на играта Need fo speed наречена Heat, покрај сите можни опции за авто-тјунинг, има на располагање и разни делови облека за својот аватар. Дали тоа некому му е потребно? Можат ли симулациите на лудечко возење за стандардни платформи за играње да понудат уште нешто освен уште поспектакуларни отсјаи на автомобилскиот лак? Одговорот гласи: да – престиж! Односно, нови можности за секој во мрежен модус да се обиде да стекне своја позиција на светската ранглиста и да се докаже во директен натпревар со останатите реални противници.

На саемот се презентираат многу нови игри. Мајкрософт тука го претставува својот Gears of War 5; компанијата THQ Nordic го оживеа својот хит Comanche, симулација на хеликоптер која својата премиера ја имаше во дамнешната 1992 година за компјутер, следеа три продолженија до 2001 година, кога сѐ замре. Сега играта, се разбира, е графички модернизирана и може да се игра и во групен модус. Една од игрите која предизвикува најголеми очекувања во следната година е Cyberpunk 2077 на полското студио CD Project red.

Само по себе се подразбира дека на саемот нема да недостига добар фудбал, па тука е и новата FIFA. На планот на графиката може да има малку нешто подобро од веќе познатото, па фирмата EA има воведено волта-модус кој многу потсетува на уличен фудбал. Изменета е и физиката на топката која сега се движи помалку предвидливо, односно пореално. Тука се и нови можности за дриблинг.

Од другите остварувања вреди да се спомене Kerbal Space Program 2, Little Nightmares 2, Predator Hunting Grounds, Humankind, Everspace 2, Disintegration, Darksiders Genesis, Iron Harvest и Death Stranding, а тука е и интерактивниот трилер на компанијата Sony – Erica, работен со вистински глумци како игран филм.

Меѓу посетителите владее големо интересирање за виртуелната реалност. Организаторите понудија систем за резервирање штандови и проби за да се избегнат долги редици. Покрај веќе познатите игри Asgards Wrath, Lone Echo II и Stormland ќе биде претставен и Phantom: Covert Ops за Oculus Rift и Quest. Дејството се одигрува во време кога Студената војна била при крај, почетокот на 90-те години.

Подеднакво големо интересирање владее и за Cloud gaming, систем за играње во кој игрите не се „вртат" во конзоли или компјутер, туку во „облак“, на екстерни сервери со кои играчите се поврзани, секако, ако станат претплатници. Систем кој личи на Netflix. Предност на тој систем е да може да се игра и со компјутери од постаро производство кои не се толку перформантни како тие од последната генерација. Мана е што без супербрз интернет – не може да се игра.

Во посебна хала се презентираат Independent-Games. Значи, „независни“. Како „зависна“ во браншата се смета фирма која нема повеќе од 50 вработени и чиј годишен обрт не преминува пет милиони евра.

Фирмите кои прават и продаваат игри за компјутери и конзоли во Германија лани оствариле обрт од 2,8 милијарди евра. Тоа е пораст од 11 проценти во однос на 2017 година, што значи побарувачката постојано се зголемува. Тренд во најголем подем е Е-спорт, кој е сѐ поомилен и за кој се заинтересирани растечки број спонзори.  Оваа бранша  во 2019 година од германскиот буџет доби 50 милиони евра и многумина се разочарани, зашто владата за следната година ја исфрли таа ставка од буџетскиот план