Мртви и повредени во железничка несреќа кај Мачу Пикчу
31 декември 2025
Два воза со туристи се судрија во близината на прочуениот древен град Мачу Пикчу во Перу. Во несреќата, еден машиновозач го загуби животот, објави портпаролот на полицијата во Куско. Најмалку 30 лица се повредени, меѓу кои наводно имало многу туристи.
Според железничкиот оператор, воз кој доаѓал од Мачу Пикчу се судрил со друг воз кој одел кон таа насока. Несреќата се случила недалеку од друго археолошко наоѓалиште, Коривајрачина. Понатамошни детали засега не се познати. Брза помош и медицински персонал биле испратени на тешко достапната локација во оддалечениот дел од Андите.
1,5 милиони посетители годишно
Околу 1,5 милиони луѓе го посетуваат Мачу Пикчу годишно, од кои повеќето патуваат со воз до блискиот град Агуас Калиентес. Во последните десет години, бројот на посетители се зголемил за околу 25 проценти.
Во исто време, туризмот во регионот повремено е засегнат од политички немири и спорови околу управувањето со локалитетот. Демонстрантите понекогаш ја блокираат железничката линија кон античкиот комплекс.
Светско наследство од 1983 година
До Мачу Пикчу може да се стигне и пеш од малото гратче Олантајтамбо. Пешачката тура трае околу четири дена. Комплексот, познат по своите совршено поставени камени блокови, бил изграден од Инките во 15 век и служел како засолниште за владетелите на империјата. Од 1983 година, Мачу Пикчу е дел од светското културно наследство.