Марш за видливост на трансродовите лица

Трансродовите лица одбиваат да бидат избришани или замолчени и продолжуваат со својата битка да бидат прифатени како интегрални членови на нашето општество. Во пресрет на 31 Март – Меѓународниот ден за видливост на трансродовите лица, Граѓанската иницијатива за заштита и унапредување на правата на трансродовите лица ТрансФормА организираше Марш за видливост на трансродовите лица во Скопје.

Со тоа и Северна Македонија се вклучи во глобалната акција за солидарност со трансродовите лица, со цел намалување на насилството и дискриминацијата со кои секојдневно се соочува оваа маргинализирана група.

„Видливоста е од суштинско значење во борбата за правата на трансродовите луѓе, особено во недоволно либерално и прилично затворено општество како македонското. Видливоста е вистински предизвик за стереотипите, ги разобличува заблудите и придонесува трансродовите луѓе да бидат прифатени како луѓе“, порачаа од ТрансФормА.