Кина: По потопот од „Доксури“, се заканува тајфунот „Ханун“
2 август 2023
Главниот град на Кина, Пекинг, го погодија незапамтени поплави во последните 140 години, соопшти денеска кинеската метеоролошка служба. Во обилните дождови што ги зафатија Пекинг и соседната провинција Хебеј на северот досега загинаа најмалку 20 луѓе, а 19 се водат за исчезнати, соопштија државни медиуми.
Максималната вредност на врнежите забележана во ноќта меѓу саботата и средата наутро на една станица во градот изнесуваше 744,8 милиметри.
„Тоа е најголемо количество на врнежи во последните 140 години“, откако се води евиденција, соопшти метеоролошката служба на главниот град.
Тајфунот „Доксури“ стигна до источната кинеска провинција Фуџијан во петокот од правец на Филипините. Обилните дождови почнаа да паѓаат во Пекинг и околните области во саботата. Количината забележана во Пекинг за само 40 часа се приближи до просечните врнежи за целиот месец јули.
Државните медиуми минатата недела предупредија дека 130 милиони луѓе ќе бидат погодени од екстремно обилни врнежи низ северна Кина.
Закана од нов тајфун
Претседателот Ши Џинпинг во вторникот повика на „сите напори" за спасување на оние кои се „загубени или заробени" поради дождот.
Земјата сега е во состојба на готовност поради пристигнувањето на тајфунот „Ханун“, шестата таква бура во годината, додека се приближува до источниот брег на Кина.
Во тоа невреме во Јапонија веќе загина едно лице, а стотици илјади останаа без струја во јужниот дел на земјата. Откажани се стотици летови до Окинава и од другите острови во областа. Тајфунот „Ханун“, кој јапонската метеоролошка агенција го опиша како „многу силен“, донесе брзина на ветер од 180 километри на час.