Германија: Советот за безбедност донесе Акциски план

Новоформираниот германски Совет за национална безбедност на својот прв состанок усвои акциски план за борба против хибридните закани, првенствено од Русија. Планот вклучува мерки за контрашпионажа и заштита на критичната инфраструктура, изјави владиниот портпарол Штефан Корнелиус во Берлин. Ова вклучува, на пример, електроцентрали, водоводни и електрични водови, како и гасоводи и нафтоводи.

Деталите за планот засега не се објавени, но се наведува дека германската влада реагира на „растечкиот број и интензитет на хибридни закани против Сојузна Република Германија, кои доаѓаат особено од Русија“.

Покрај тоа, Советот се осврнал и на стратешките зависности од критични суровини, како што се ретките метали од Кина. И за ова прашање треба да се развие акциски план до крајот на годината.

Се спојуваат две тела

Во својот коалициски договор, ЦДУ, ЦСУ и СПД се согласија да формираат Совет за национална безбедност, спојувајќи го постојниот Сојузен совет за безбедност, кој првенствено се занимаваше со прашања поврзани со извозот на оружје, и Кабинетот за безбедност. Советот треба да се состанува за време на кризи и да развива стратегии за ситуации на закана. Компетенциите и знаењето ќе бидат подобро поврзани, обработени и координирани, за сојузната влада да може да донесува одлуки врз основа на широки и фундирани информации.

Со Националниот совет за безбедност претседава канцеларот Фридрих Мерц. Други членови се министрите за финансии, надворешни работи, одбрана, внатрешни работи, правда, економски прашања, развој, дигитални прашања и шефот на Канцлерамтот. Во зависност од потребата, може да бидат повикани и консултирани и други членови на сојузната влада. Во работата на Советот може да учествуваат и претставници на германските безбедносни власти. Новитет е тоа што може да бидат консултирани и претставници на сојузните покраини, како и претставници на други држави, Европската Унија или НАТО.