Лотарија демантира: Неправилностите се од претходниците

Државна лотарија реагира на објавените медиумски написи во кои се тврди дека Државниот завод за ревизија утврдил значителни неправилности во финансиското работење на компанијата за 2024 година. 
Во демантот се наведува дека објавените информации се „неосновани, тенденциозни и нецелосни“, бидејќи не е направена јасна дистинкција меѓу периодот на управување од претходното раководство (СДСМ и ДУИ) и тековното раководство. „Таквиот пристап создава погрешна слика во јавноста и претставува сериозно отстапување од принципите на објективно и точно информирање,“ се вели во реакцијата.  

Од компанијата, која е единствен државен приредувач на игри на среќа во Македонија, велат дека веднаш по преземањето на функцијата, во септември минатата година, новото раководство побарало целосна ревизија од Државниот завод за ревизија со цел утврдување на фактичката состојба и идентификација на евентуални неправилности наследени од претходното раководство. 
Во демантот, од Државна лотарија се закануваат и со тужби за клевета до медиумите доколку не ги повлечат објавените содржини. Според Државна лотарија, спорно е што медиумите не воделе сметка за временската рамка и селективно пренесувале делови од извештајот на ревизорот.