Принудни одмори поради ѕидот на Трамп | Свет | DW | 22.12.2018
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Реклама

Свет

Принудни одмори поради ѕидот на Трамп

На полноќ по локално време во САД стапи во сила т.н. „шатдаун“. Тоа значи принуден одмор за бројни државни службеници. Иницијална каписла за блокадата на владата е граничниот ѕид кон Мексико- изборно ветување на Трамп.

САД денеска влегоа во период на делумна парализа на работата на сојузните органи на власта по неуспешниот обид за компромис меѓу Конгресот и Белата куќа околу буџетот и во прв ред финансирањето на ѕидот на границата кон Мексико, кој сака да го подигне претседателот Доналд Трамп. Државната администрација од денеска не добива финансии и поради тоа во наредните денови ќе ги намали своите активности.

Стотици илјади вработени во државните служби ќе бидат на принуден и неплатен одмор или ќе работата без паричен надоместок поради делумната блокада на работата на администрацијата. И покрај обидот за компромис, претставниците на двата дома на Конгресот не успеаја да постигнат договор за буџетот и за финансирање на граничниот ѕид, а продолжението на седницата е предвидено за денеска попладне по локално време.

Претседателот Трамп на Твитер изрази надеж дека делумната блокада на сојузните органи нема да трае долго. Преговорите за буџетот се традиционално тешки и често завршуваат со договори за привремено финансирање на владата. САД веќе имаа таква ситуација три дена во јануари 2018 година.

 

DW.COM

Реклама