Првиот лет од скопскиот аеродром на 1 јули за Германија | Северна Македонија | DW | 29.06.2020
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Реклама

Северна Македонија

Првиот лет од скопскиот аеродром на 1 јули за Германија

По повеќемесечна пауза, меѓународните аеродроми во Скопје и Охрид ќе ги отворат вратите за патници в среда. Надлежните претходно донесоа посебни протоколи за патниците.

Со летот на „ВизЕр“ за Бремен, Германија во 6 часот наутро, меѓународниот аеродром во Скопје и официјално ќе започне со работа по пауза од речиси триипол месеци. Утрото ќе се лета и за Ларнака, Стокхолм и Келн со истата компанија. Меѓународниот аеродром во Скопје е затворен од 19 март годинава, а охридскиот од 16 март поради пандемијата на коронавирус.

Патниците ќе мора да минат ригорозна здравствена контрола пред да се упатат на посакуваната дестинација. Дополнително, голема е веројатноста дека македонските државјани нема да можат да патуваат во земјите од ЕУ. Причината е високата стапка на заразени од Ковид-19 во Северна Македонија, која е далеку од просекот во земјите-членки на ЕУ.

Што се однесува до новите правила на аеродромите во земјата, тие беа објавени минатата недела од компанијата ТАВ- Македонија.

Според новиот протокол, патниците ќе треба да пристигнат на аеродромите најмалку 3 часа пред нивниот лет, да стават заштитна маска пред да влезат во терминалната зграда на аеродромот, да ги дезинфицираат обувките и рацете на самиот влез во зградата и постојано да одржуваат физичко растојание.

Во аеродромските згради ќе можат да влегуваат само патниците. Семејствата и пријателите ќе мора да останат пред објектот.
Секој патник ќе биде скениран со термална камера и во случај да има зголемена телесна температура, нема да може да патува.

 

DW.COM

Реклама