Мицкоски: Низ демократија и улица тргнуваме кон промени! | Северна Македонија | DW | 14.06.2022

Посети ја новата страница на DW

Погледнете ја бета-верзијата на dw.com. Сѐ уште не сме готови! Вашето мислење може да ни помогне да ја направиме подобра!

  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Реклама

Северна Македонија

Мицкоски: Низ демократија и улица тргнуваме кон промени!

По општинските комитети се бара возило повеќе за да им се овозможи на луѓето кои изразиле желба да присуствуваат на протестот в сабота, вели лидерот на ВМРО-ДПМНЕ и најавува масовност

Знамиња, пароли, пораки за промени, обезбедување возила за превоз... Во општинските комитети на ВМРО-ДПМНЕ е многу фреквентно, со оглед дека привршуваат подготовките за најавениот протест на 18-ти јуни во Скопје.

„Очекувам голема посетеност и одзив на народот на протестот кој ќе се одвива под слоганот ‘Премногу е! Протест за промени’, вели за ДВ лидерот на партијата,  Христијан Мицкоски.

Тој уште минатиот месец 18-ти јуни го опиша како датум-меѓник помеѓу првиот и вториот дел од партиските активности, кои ќе бидат континуирани во текот на летото. Според најавените активности, ова лето ќе биде политички многу жешко, а според економските показатели - и многу тешко.

„Лошиот живот, инфлацијата, лошата економија стануваат неподносливи, а огромен број на граѓани бараат излез од актуелната состојба. И, знаејќи дека поминаа 5 години од истата влада, многу јасно е дека за неколку месеци од сега нема да се живее подобро. Од тој аспект најдобро решение се избори, на кои оваа Влада ќе биде срушена. Подготовките течат на солидно ниво и можам да кажам дека има огромен интерес и одзив на многу луѓе кои ќе дојдат во Скопје на 18-ти јуни. По општинските комитети се бара возило повеќе за да им се овозможи на луѓето кои изразиле желба да присуствуваат на тој протест“, вели партискиот претседател.

Мобилизација и масовен активизам

Со масовно присуство партијата сака да испрати порака до власта какво е расположението на граѓаните за промени, но и свесна е дека тие промени не може да се случат ниту преку ноќ, ниту со еден протест.

„Оваа власт која силно ги узурпира институциите и процесите не е можно да падне со еден протестен собир. Целта на протестот е да испратиме порака на масовност, дека овој народ има свој став, но и да дадеме јасна порака дека вака повеќе не може. Воедно ќе испратиме и порака дека Владата не смее да го игнорира народот и неговата волја, и затоа во периодот што следи ќе бидеме уште погласни и уште поприсутни, и во тој аспект сите опции се возможни“, најавува Мицкоски, кој на протестот ќе има обраќање пред граѓаните.

Во овој момент лидерот на  ВМРО-ДПМНЕ  не ги открива сите можни опции, но вели дека тие ќе кулминираат со масовен активизам.

„Наредните чекори ќе бидат во правец на рушење на власта користејќи ја демократијата, улицата и обединувајќи го народот против најголемата причина за колективната несреќа, а тоа е оваа власт. Кога нема никаква причина да се одржи Владата, природно е да се провери волјата на народот и да има избори. Доколку таа можност се одбие, тогаш на сцена ќе стапат чекорите кои ќе ги најавиме во периодот што следи, а се во насока на мобилизација и масовен активизам“, најавува Мицкоски.

Nord-Mazedonien | Hristijan Mickoski wiedergewählter Präsident von VMRO-DPMNE

Лидерот на ВМРО ДПМНЕ, Христијан Мицкоски: мобилизација и активизам

Избори веднаш или по две години?

Во изминатиов период копјата меѓу власта и опозцијата постојано се кршат по прашањето - дали се нужни предвремени избори? Власта смета дека „не се потребни и не е време за тоа“, а опозицијата - дека „за оваа катастрофа, актуелната влада не е решение, туку проблем“.

„Нема да глумиме нормализација, затоа што и реалноста која ја живееме не е нормална“, порачува  Мицкоски во повеќе наврати.

Тој вчера оствари средба со Марион Валсман, пратеничка во ЕП и потпретседателка на Заедничкиот парламентарен комитет на Делегацијата на ЕУ во Македонија, и со Даниел Браун, официјален претставник на Фондацијата Конрад Аденауер за Македонија. На средбата се разговарало за потребата од отпочнување на преговорите на РСМ со ЕУ, кое може да се случи со тргање на неразумното вето од страна на Бугарија. Мицкоски на средбата истакнал дека земјата „оди во многу лоша насока со владата на СДСМ и ДУИ, дека тоне во кризи кои не се увезени туку автентични, и дека излез од катастрофалната состојба се само предвремени парламентарни избори, кои треба да се случат што побрзо“.

Премиерот  Ковачевски  во повеќе наврати повторува дека нема да има предвремени, туку избори во редовен термин.

„Избори ќе има во 2024 година. Доста беа времињата кога во државата се правеа избори на две години. Владата има полн легимитет и мандат, посветена е на решавање на проблемите и справување со предизвиците пред граѓаните и државата“, порачува Ковачевски.

Шефот на дипломатијата, Бујар Османи, пред неколку дена на „Канал 5“ изјави дека парламентарни избори ќе има во мај 2024 година, заедно со претседателските. Тој посочи дека процениле оти  предвремени избори  не се во интерес на граѓаните и државата.

„Тоа треба да го тргнеме од маса и како можност за разговори“, рече Османи, потенцирајќи дека фокусот сега треба да се стави врз тоа како да се менаџира кризата. Според него, треба да изнајде начин со опозицијата да има базичен договор за справување со кризата.

За договор е потребен дијалог, а Мицкоски минатиот месец за ДВ изјави дека со премиерот Ковачевски досега немале никаков контакт.

И амандманска битка

Протестот на ВМРО-ДПМНЕ ќе се одржи во политички фреквентен период - една недела пред самитот на врвот на ЕУ и очекувањата на РСМ за деблокада на бугарското вето. Тој процес е проследен со бројни критики од опозицијата за начинот на кој власта ги води разговорите со Софија, но и жестоки критики кон „дериватите“ настанати како резултат на нејзина ненавремена реакција или отсуство на реакција, вклучително и за „сарказмите“ на албанскиот премиер Еди Рама.

Тоа не е единствениот фронт во моментов. Вториот е насочен кон расправата за  ребалансот на буџетот за 2022 година,  за кој од опозицијата велат дека „е директен доказ оти земјата е на раб од банкрот, економски разрушена и во која на дневна основа се зголемува сиромаштијата“.

Пратеничката група на ВМРО – ДПМНЕ и на коалицијата „Обнова на Македонија“, поднесе 174 амандмани, при чие креирање велат дека се раководеле од три приоритети: стимулирање на економијата преку капитални инвестиции кои се остварливи, помош на граѓаните и стопанството, и спречување на расипничкото трошење на парите од страна на власта. Меѓу позначајните се амандманите за намалување на акцизи и ДДВ за горива, ослободување од ДДВ за храна, како и финансиска поддршка за фотоволтаични и соларни системи за домаќинствата.