Историчарите од Скопје и Софија сè уште далеку од решение | Северна Македонија | DW | 10.12.2021

Посети ја новата страница на DW

Погледнете ја бета-верзијата на dw.com. Сѐ уште не сме готови! Вашето мислење може да ни помогне да ја направиме подобра!

  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Реклама

Северна Македонија

Историчарите од Скопје и Софија сè уште далеку од решение

Експертите од Комисијата за исторички и образовни прашања два дена дискутираа, но не најдоа заеднички јазик за спорните прашања.

И 16-та средба на Заедничката мултидсциплинарната експертска комисија за историски и образовни прашања заврши без позитивен епилог. Експертите од Северна Македонија и од Бугарија на дводневна онлајн средба дискутираа за забелешките за учебниците по историја, но не најдоа заеднички јазик за спорните прашања.

„Остануваат разликите во пристапот и разбирањето на улогата на историјата и историското образование во современите општества и градењето на добри односи ослободени од политизирање на историјата“, информираат од Министерството за надворешни работи.

Според македонските историчари, пристапот кој се заснова на позитивните европски искуства и препораките на Советот на Европа и УНЕСКО остануваат основа во работата на македонската страна во Комисијата и од тука произлегуваат главните недоразбирања со колегите од Софија. „Тие остануваат на исклучивиот пристап кој е туѓ на современото разбирање на историското образование кое подразбира мултиперспективен и интердисциплинарен пристап“, укажуваат од МНР.

По дводневните дискусии, заклучокот е дека двете страни се сè уште далеку од решение кое би довело до подобрување на образовниот процес и остварување на заедничката цел за градење добрососедски односи и пријателство во кое минатото и различните толкувања на историјата нема да бидат пречка.

Разговорите заглавија кај цар Самуил

Еден од претседавачите на Мешовитата историска комисија меѓу Бугарија и Македонија, професорот Ангел Димитров за БГНЕС вели дека „кога не сакаш да прифатиш основна формулација на самиот Договор за пријателство и добрососедство, односно дека има заедничка историја, тоа значи дека се сомневаш во примената на тој договор“. Тој вели дека резултатите од средбата се еднакви  на „нула“.

„Разговаравме и за цар Самуил и повторно разговорите не вродија со плод. Заглавени сме во X-XI век. Се плашам дека и следната година ќе биде тешко да постигнеме напредок“, вели Димитров.

-повеќе на темата: Македонските предлози неприфатливи за бугарските историчари – незадоволството на двете страни

Во текот на двата дена, членовите на Комисијата работеле и на усогласување на содржината на записниците од минатите средби. Мешовитата македонско-бугарска комисија беше формирана согласно Договорот за пријателство, добрососедство и соработка потпишан меѓу двете земји во 2017 година. Ова беше последниот  состанок на Комисијата за годинава. Следната средба треба да се одржи на 24 и 25 февруари идната година.