Првата бројка во македонскиот ковид-биланс беше запишана на 26-ти февруари минатата година. Средовечна жена, која по едномесечен престој во Италија со комбе пристигна во земјава, беше првиот регистриран случај кај кој тестот на SARS-CoV-2 беше позитивен. Добрата вест беше дека ниту еден од нејзините десетина сопатници не се инфицирал во текот на патувањето.
Надвор од границите на Северна Македонија, првиот случај на заразен македонски државјанин беше регистриран малку порано, на 13-ти февруари. Македонецот бил член на посадата на бродот „Дајмонд Принцес“ со 3.500 патници, каде првиот потврден случај на заразен бил на 4-ти февруари. Бродот беше закотвен и ставен во карантин на пристаништето во Јокохама, Јапонија, а македонскиот државјанин пренесен на лекување во тамошната болница.
Од еден до...
Месецот февруари минатата година заврши со еден регистриран случај на заразен. Растот почна да се регистрира од почетокот на март, поради што беа донесени првите позначајни мерки за превенција од ширењето на вирусот: по седум потврдени позитивни на вирусот, превентивно на 11-ти март беа затворени градинките, училиштата и факултетите, а забранети јавните настани.
Поради доминација на новозаразени од подрачјето Дебар, во таа и во соседната општина Центар Жупа, на 13-ти март беше прогласена кризна состојба: двете општини практично беа ставени во карантин, со ангажирање на Армијата.
Повеќе:
-Бројот на новозаразени од Ковид-19 во С. Македонија повторно расте
-Први вакцинирани во С. Македонија против Ковид-19
-Британска мутација внесе немир во С. Македонија
По предлог на техничката влада (формирана заради закажаните парламентарни избори) претседателот Стево Пендаровски на 18-ти март прогласи вонредна состојба на целата територија, мерка што се воведе за првпат во историјата на државата. На 22-ри март беше забрането движење на населението во периодот од 21 до 06 часот секој ден, на територијата на целата држава. Здравствените власти апелираа да се почитување на ограничувањата на движењето и на другите превентивни мерки за заштита од коронавирусот, бидејќи преку таква самодисциплина одржат т.н. блага крива на заразата, и же се спречи заразата одеднаш да ги оптовари или колабира ресурсите на здравствениот систем.
-
Како коронавирусот го промени животот
Ставете маска
И покрај тоа што македонските здравствени власти постојано предупредуваат дека носењето маска е важно за превенција од пандемијата на коронавирус, дел од луѓето сѐ уште се противат на носење маски. За неносење маски казната за граѓаните е 20 евра, за правните лица – 2000 евра. Затоа влезовите на продавниците од почетокот на пандемијата се „украсени“ и со вакви предупредувања.
-
Како коронавирусот го промени животот
Рестрикции и на отворено
Во С. Македонија маски мора да се носат и на отворено, а забрането е и групирање на јавен простор на повеќе од 4 лица по 21 часот. Не се групирајте, е апел кој постојано се повторува од страна на надлежните. Резултатите се половични – покрај дисцплинираните, сѐ уште има луѓе кои се групираат и не преземаат превентивни мерки. Оваа празна клупа трпеливо чека на крај на пандемијата и рестрикциите.
-
Како коронавирусот го промени животот
Здравствена криза, економска криза
Угостителските објекти работат со ограничено работно време – само до 21 часот. Исклучок се оние со сервис за испорака. Празните ресторани и кафулиња ја отсликуваат новата реалност што ја создаде пандемијата на Ковид-19. Многу фирми, посебно малите, се плашат од пропаѓање. Ќе им бидат ли доволни средствата за помош од државата?
-
Како коронавирусот го промени животот
Каде се другарите?
Околу 90% од учениците следат онлајн-настава, а без проблеми се одвива и наставата со физичко присуство, тврди министерката за образование Мила Царовска. Пандемијата ја забрза дигитализацијата на образованието. Но, привремено го запре нормалниот детски живот. Како актуелното намалување на социјалните контакти влијае врз детскиот развој ќе биде веројатно предмет на многу истражувања во иднина.
-
Како коронавирусот го промени животот
Помала осаменост со домашно милениче
Домашните миленици, во време на затворање дома, можат да бидат добар чувар од психолошкиот стрес што со себе го носи пандемијата. Според студија на универзитетите Јорк и Линколн, 90% од испитаниците сметаат дека домашното милениче им помогнало во емоционалното справување со „локдаунот“, а дури 96% се уверени дека со помош на домашното милениче останале во добра физичка кондиција.
-
Како коронавирусот го промени животот
Сѐ за здравје
Од почетокот на пандемијата на Ковид-19, во пораст е побарувачката по витамини и сѐ што може да придонесе за зајакнување на имунитетот. Конзумирањето суплементи стана секојдневна рутина на многумина. Притоа, голем дел од она што го препорачуваат лекарите, не го покрива Здравствениот фонд, туку е приватен трошок. Лекувањето чини пари, превенцијата исто така. Но, сѐ за здравје!
Автор: Александра Најдовска, ЕМФ
Брз раст на заразените
Ако до крајот на март бројката на заразени беше малку над 300 случаи, до крајот на април стигна речиси до 1.500 со 77 смртни случаи. Неславен рекорд беше регистриран на 16-ти април со 107 новозаразени, и преминување на „психолошката граница“ од над 1.000 дијагностицирани пациенти со Ковид -19. До крајот на мај имаше околу вкупно 2.200 заболени и 130 смртни случаи, а до крајот на јуни до 6.200 заболени и 300 починати.
Во тој период граѓаните поминаа многу празнични и викенд карантини, од кои најдолгото, 85-часовно ограничување на движењето траеше за време на Велигденските празници. Годината главно помина во рестрикции за патувања, со оглед дека многу земји ги затворија границите, а авиокомпаниите ги откажаа летовите. „Новото нормално“ стана живот под маски и под постојани апели за заштита - миење раце и држење дистанца. Беа донесени и седумдесетина протоколи со кои се регулираа сите сегменти од секојдневието во согласност со мерките за здравствена заштита - работа, јавен превоз, државни, културни и спортски настани итн.
-
Гласање во време на пандемија
Патувачка гласачка кутија
Први гласаат граѓаните позитивни на Ковид-19 и оние кои се наоѓаат во изолација. Вкупно 706 лица се пријавиле во ДИК, а ги опслужуваат 54 избирачки одбори во кои има и медицински лица. Членовите на одборите одат во домовите на болните со посебни протоколи за заштита како што можете да видите и на фотографијата. Сите носат мантил, ракавици, заштитна маска, визир, очила и средство за дезинфекција.
-
Гласање во време на пандемија
Патот до гласачката кутија
Ширум државата в среда ќе бидат отворени 3.480 избирачки места, а право на глас имаат нешто над 1,8 милиони граѓани. Процедурата на гласањето овојпат во многу нешта ќе се разликува од вообичаената во „старата“ нормалност: контрола и задолжително носење маска, доколку е неопходно и чекање ред пред гласачкото место, а во самата просторија- посебен протокол- додека ливчето да стигне до кутијата.
-
Гласање во време на пандемија
Контрола пред гласање
Пред влезот на секое гласачко место ќе стојат полицајци чија главна задача е да обезбедат дека секој граѓанин влегува во просторијата со маска и го почитува протоколот. Влез без маска на устата и носот не е дозволен, и истата мора да се носи во текот на целиот процес, се до напуштањето на објектот.
-
Гласање во време на пандемија
Колку паравани- толку гласачи
По влегувањето во објектот, во зависност од околностите, можно е да треба да се причека пред влезот во гласачката просторија. Тоа е наложено со цел да се избегнуваат турканици на мал простор во собата за гласање. Во просториите ќе се пропуштаат онолку гласачи колку што има паравани за гласање.
-
Гласање во време на пандемија
Следете ја процедурата
Внатрешноста на просториите за гласање е одбележана со маркери за одржување дистанца. Таму следува традиционалната проверка со УВ лампа, предавање на личната карта од пропишаната дистанца, кусо симнување на маската заради идентификација, земање на гласачкото ливче и прскање со спреј на палецот.
-
Гласање во време на пандемија
Побезбедно од одење во маркет
Се што ви останува по земањето на гласачкото ливче е да го заокружите својот избор на него и да го уфрлите во гласачката кутија. На заминување не ја заборавајте својата лична карта и носете ја заштитната маска, најмалку, до напуштањето на објектот. Здравствените власти и епидемиолозите уверуваат дека гласањето ќе биде безбедно за сите и дека ризикот е помал одошто одење во маркет.
Автор: БГ
Начинот на работа некаде се адаптираше во согласност со потребите од превентива, со сменско работење или ротации, а некаде целосно се промени: „работа од дома" и „онлајн настава" станаа најчесто споменуваните зборови.
Ако пролетта луѓето стравуваа од денот кога бројот на вкупно заразени ќе достигне до 1.000 случаи, веќе во октомври лани „илјадарката“ стана дневна бројка на новодијагностицирани. Една година подоцна бројката на заразени е до 101.214 лица, на оздравени 90.685, на активни случаи 7.418, а на починати 3.111.
Имунизацијата доцни
Надежта останува во процесот на имунизација, кој во земјава започна благодарение на донација на вакцини од соседна Србија. Станува збор за околу 8.000 дози, со кои ќе се комплетира вакцинацијата на околу 4. 000 здравствени работници, по што ќе треба да се вакцинираат хронично болните и повозрасните лица. Засега е неизвесно кога ќе уследи таа фаза, бидејќи сѐ уште не се знае кога ќе пристигнат кинеските вакцини и оние на „Фајзер".
Но, извесно дека и 2021 година ќе помине во рестрикции, и заради доцнењето на доставата на вакцините, но и поради новите, позаразни видови на вирусот. Лидерите на Европска Унија вчера потврдија дека ќе ги задржат „цврстите ограничувања“ на јавниот живот и слободното движење токму поради појавата на новите видови на вирусот, поради кои и имунизацијата може да стане континуиран процес подолг временски период. Бидејќи фармацевтските компании доцнат во испораката на вакцини против Ковид-19, неизвесно е дали ќе се реализира целта - вакцинирање на 70 отсто од возрасното население во ЕУ до крајот на летото.
Поради тешкиот пристап до вакцини, во земјава не може да се направи проценка кога би можел да заврши процесот на имунизација на поголемиот дел од населението.
-
Пандемија: Животот свртен на глава
Колективно физичко дистанцирање
Сингапур има многу ниски стапки на инфекции со коронавирусот од октомври досега. Набљудувачите ја фалат оваа град-држава во југоисточна Азија за одржување на вирусот под контрола со внимателно следење на нејзините граѓани, делумно со апликацијата за задолжително следење. Падот на инфекциите значи дека локалното население може да посетува кино на отворено - под услов да се одржува физичка дистанца.
-
Пандемија: Животот свртен на глава
Во Јужна Африка се шири страв
Јужна Африка е најтешко погодената африканска земја од пандемијата на коронавирусот. Овој пациент во болница во близина на Кејп Таун е еден од 1,4 милиони граѓани кои се заразени со Ковид-19. Новата варијанта на коронавирусот, позната како B.1.351 или 501Y.V2, само го зголеми стравот. Исто како и новата варијанта на британскиот вирус, се смета дека оваа јужноафриканска мутација е многу позаразна.
-
Пандемија: Животот свртен на глава
„Социјално дистанцирање на сонце“
Со зголемените летни температури, многу Австралијци се во можност да уживаат во освежително пливање во океанот. Поставени се знаци за да ги потсетат посетителите на плажите да држат дистанца додека уживаат во сонцето, во обид да се спречи нов пораст на инфекции. Австралија забележа значително намалување на бројот нови случаи од септември наваму.
-
Пандемија: Животот свртен на глава
Болка поради оние кои починаа
Келвија Андреа Гонкалвес (16) плаче на гробот на нејзината мајка во бразилскиот град Манаус - Андреа дос Реис Брасао почина на само 39-годишна возраст. Таа е една од безбројните жртви од Ковид-19 во градот кој остана без неопходниот кислород. Многу луѓе го обвинуваат екстремно десничарскиот претседател Жаир Болсонаро за мрачната состојба во земјата. Во Бразил од вирусот починаа над 221.000 лица.
-
Пандемија: Животот свртен на глава
Што е сигурно е сигурно?
Во Хонг Конг, властите оградија цели населби без предупредување како одговор на ненадејниот пораст на инфекциите. Градот, посебен административен регион на Кина, наметна слични драконски мерки за спречување на епидемијата на вирусот како оние кои беа во сила во Кина. До неодамна, стапките на инфекции тука беа многу ниски.
-
Пандемија: Животот свртен на глава
Танцување во сопствен меур
Американскиот рок-бенд The Flaming Lips смисли начин како да организира концерти со физичка дистанца: на неодамнешниот концерт во Оклахома Сити, бендот ја замоли публиката да влезе во пластични меури кои се надувуваат. На овој начин, тие можеа да се танцуваат додека безбедно се изолирани во сопствени меури. Публиката дури можеше да го држи на раце и фронтменот Вејн Којн кој се стркала од сцената.
-
Пандемија: Животот свртен на глава
Цркви претворени во центри за вакцинација
Многу цркви во моментов се затворени поради пандемијата, па местата за богослужба се претвораат во центри за итна вакцинација- како тука во катедралата Лихфилд, во близината на Бирмингем, Англија. За разлика од земјите во ЕУ кои во моментов се соочуваат со недостиг на вакцини против Ковид-19, Велика Британија редовно се снабдува со дози.
-
Пандемија: Животот свртен на глава
Светло на крајот од тунелот
Ејми Езат подготвува торта во форма на вакцина која треба да се дистрибуира меѓу пациентите со Ковид-19 кои се лекуваат во болницата во Каиро. Египет се бори да ја активира својата кампања за имунизација низ целата земја. Сепак, на многумина можноста да се вакцинираат против коронавирусот им дава огромно чувство на надеж.
Автор: Инес Ајзеле
