Во што веруваат Македонците: „Не“ за вакцина против Ковид-19, „Да“ за теории на заговор | Северна Македонија | DW | 15.12.2020
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Реклама

Северна Македонија

Во што веруваат Македонците: „Не“ за вакцина против Ковид-19, „Да“ за теории на заговор

Повеќе од половината анкетирани во Северна Македонија веруваат во теории на заговор во однос на коронавирусот, и исто толку одбиваат да се вакцинираат против Ковид-19. Слично е на целиот Западен Балкан.

Доколку сте од оние кои чашата секогаш ја гледаат „половина полна“, следуваат добри вести: дури и ограничено количество вакцини против Ковид-19 веројатно ќе бидат доволни за во Северна Македонија да се заштитат од коронавирусот сите кои тоа го сакаат. Доколку резултатите од истражувањето на јавното мислење во земјите од Западниот Балкан, кое денеска го објави мрежата БИПАГ, се пресликаат во реалноста тоа ќе значи дека преку еден милион граѓани на Северна Македонија ќе одбијат да примат вакцина против опасната вирусна зараза.

Ако е за утеха, во регионот на Западниот Балкан слично како и во Северна Македонија, повеќе од половината од испитаниците велат дека немаат намера да се вакцинираат, односно немаат доверба во вакцината против Ковид-19. 

-повеќе на темата: Вакцина за коронавирус– одговори на најважните прашања

Во Северна Македонија над 40% од испитаниците одговориле дека „со сигурност“ нема да се вакцинираат, додека уште над 10% рекле дека „веројатно нема“ да се вакцинираат. Тоа веројатно ќе им остави доволно вакцини на малцинството граѓани кои „со сигурност“ ќе се вакцинираат- околу 15%, и оние кои „веројатно“ ќе се вакцинираат- околу 20%. Останатите 10% од анкетираните се уште не одлучиле што ќе прават.

„Најсериозната грижа на многу граѓани кои не сакаат да се вакцинираат е безбедноста на вакцината, поради брзината со која тие се развиваат“, заклучуваат од БИПАГ.

USA Indianapolis | Coronavirus | Demonstrationen

Не за вакцина и на обетки. фото: Демонстрант во САД


На европско ниво, тенко мнозинство од анкетираните граѓани велат дека ќе се вакцинираат. На Западниот Балкан тој тренд е обратен, и е далеку понизок од европскиот просек. Во регионот, над 53% од анкетираните граѓани нема да се вакцинираат, додека само 39% веројатно или сигурно ќе се вакцинираат. Споредбата на податоците покажува дека во Германија околу 53% од анкетираните би се вакцинирале, во Австрија 45%, а во Франција- 54%.

Бил Гејтс и Кина се виновни!

Кон овие податоци треба да се додадат и сознанијата до која дошла анкетата во однос на верувањето во теориите на заговор во регионот и во Северна Македонија. Па така, речиси 50% од македонските испитаници веруваат дека коронавирусот бил произведен од кинеската влада во лабораторија. Исто толку веруваат дека фармацевтската индустрија е вмешана во ширењето на коронавирусот. Речиси 30% во Северна Македонија веруваат дека има врска меѓу 5Г технологијата и коронавирусот. Близу 40% веруваат дека американската армија го развила коронавирусот како биолошко оружје, а исто толку дека Бил Гејтс го користи коронавирусот за да „протурка“ вакцина со микрочип со кој ќе се следат луѓето. 

-повеќе на темата: Лична приказна: Моето искуство со Спутник 5, руската вакцина против Ковид-19

Севкупно, над половината од испитаниците во Северна Македонија „многу веруваат“ во теориите на заговор кои им биле презентирани, додека над 60% веруваат во некои од овие теории. Рекордер по вербата во теориите на заговор во регионот на Западниот Балкан е Албанија, но ни другите земји не заостануваат многу.

Australien Melbourne | Coronavirus | Demonstrationen

Протести на антиваксерите во Мелбурн, Австралија


„Овие заговори не само што можат да ја попречат ефективната борба против пандемијата; тие исто така укажуваат на закана кон демократијата во регионот. Високото ниво на верување во теории на заговор се совпаѓа со зголемување на побарувачката за строго лидерство и опаѓање  на демократијата, обезбедувајќи плодна почва за натамошен демократски пад и антагонизам“, наведуваат во заклучоците на студијата од БИПАГ. 
Македонскиот министер за здравство Венко Филипче деновиве, потсетувајќи на антиваксерската кампања против морбилите, најави дека во земјата се подготвува кампања во поддршка на вакцинацијата против Ковид-19, а ќе бидат преземени и мерки против оние кои ќе шират лажни вести во врска со неефикасноста на вакцината или нејзината поврзаност со некои болести. Според Филипче, вакцините ќе пристигнат во Северна Македонија во март следната година. 
Анкетата која ја презентираше Советодавната група за јавна политика „Балкан во Европа” (БИПАГ), била спроведена во октомври годинава, на репрезентативен примерок од над 1.000 испитаници, од кои 90% одговориле на прашањата телефонски, а 10% тоа го сториле онлајн. Целата студија можете да ја прочитате на следниот линк. 

DW.COM

Реклама