Ходорковски почнува нова страница во животот
21 декември 2013„Најстариот син на Михаил Ходорковски, Павел, веќе си го виде татка си“, информира портпаролката на Ходорковски, Олга Писпанен. „Тие се сега заедно во Берлин“, додаде таа.
„Се радувам за минутата во која повторно ќе можам да ги прегрнам моите сакани“, рече вчера по пристигнувањето во Берлин таткото на четири деца Ходорковски, без да ги прецизира своите планови.
Поранешниот нафтен магнат и најбогат Русин, а до вчера и затвореник, почнува нов живот како слободен човек во Германија, откако со изненадувачка одлука за помилување, од страна на рускиот претседател Владимир Путин, Ходорковски се најде на слобода. Тој е жесток критичар на руските власти и мина десет години зад решетки. Во, како што се чини, договор со германската влада, тој вчера беше спроведен од затвор на северозападот на Русија со авион во Берлин.
Некои аналитичари веднаш прокоментираа дека Ходорковски е принуден на бегство, но портпаролот на Путин ги негираше ваквите тврдења.
„Тој е слободен човек да се врати во Русија. Апсолутно“, изјави портпаролот Пешков. Тој сепак одби да каже дали се поставени одредени услови за негово ослободување и дали тој ќе може да учествува на избори во Русија. Портпаролот на Путин информираше дека 50-годишниот Ходорковски му испратил две писма на Путин – едно пократко и со правна содржина, а друго подолго и со лични забелешки. Детали за писмата портпаролот не даде.
Реакции со пораки до Путин
Во првото обраќање до јавноста преку изјава, Ходорковски рече дека побарал помилување од Путин, но тоа не било реализирано се’ додека во работата не се вмешал поранешниот германски министер за надворешни работи Ханс-Дитрих Геншер, кој беше на таа позиција од 1974 до 1992 година. Ходорковски изјави дека Геншер помогнал во преговорите за негово ослободување.
„Нему му е добро, со оглед на околностите“, изјави Геншер. „Иако не разбирам Руски, можам да посведочам за неговиот телефонски разговор во автомобилот со роднините, а тоа беше емотивно. Разбирливо, по десет години, коишто мораше да ги издржи“, додаде Геншер. Тој не знае дали Ходорковски планира да остане во Германија.
Германскиот министер за надворешни работи Франк Валтер Штајнамер вчера го поздрави ослободувањето на Ходорковски. „Тоа е добра вест“, рече тој. Сега би морале да продолжат разговорите со Русија околу правната држава и човековите права. Исто така и канцеларката Ангела Меркел изрази задоволство: „Многу често се залагав за тоа, господин Ходорковски да биде ослободен“, рече Меркел.
И САД ја поздравија одлуката за ослободување на Ходорковски, но испратија и забелешкидо Кремљ.
„Ние постојано ги изразуваме нашите грижи за прекршување на процедурите и селективното судење во Русија, вклучувајќи го и она против Ходорковски и неговиот бизнис-партнер Платон Лебедов, кој и натаму останува во затвор“, изјави државниот американски секретар Џон Кери. „САД сило на охраврува Русија да направи реформи и да воведе транспарентен, независен и релевантен судски систен кој се придржува до обврските за почитување на човековите права, владеењето на правото и недискриминацијата“, додаде Кери.