Симон Трпчевски во Концертхаус во Берлин

Суверено, до перфекција прецизно и со многу радост! Вака синоќа Симон Трпчевски, во преубавата сала на Концертхаус во Берлин, го отсвире Концертот број 1 за клавир и оркестар на Сергеј Рахмањинов.

Симон по пет години, втор пат свири во Концертхаус. Концертот е дел од европската турнеја на симфонискиот оркестар на Холандското радио кој го води исклучителниот диригент Јаап ван Цведен. По Бирмингем, Манчестер и Бејзинсток, минатиот викенд имало кратка пауза во турнејата. Трпчески изминатиот викенд имал настап во Москва, со оркестарот на Бољшој театарот. По Берлин, наредни станици се Виена и Келн.

Комлименти од публиката

„Во секој случај, ова е многу одговорна турнеја. Мислам дека Германците ќе уживаат во една многу свежа музика - Концертот број еден на Рахмањинов. И се надевам на позитивни реакции”, изјави за Дојче веле Трпчевски.

И реакциите на публиката беа навистина позитивни. Аплаузот не стивнуваше. Публиката бараше повеќе. За сладокусците и вљубениците на класиката Симон свиреше уште двапати.

„Воодушевена сум! До сега не сум го слушала, но беше прекрасно, особено она што го свиреше на бис: Менделсон и Шопен", вели една од посетителите на концертот.

„Многу добро, прекрасно. Јас често посетувам концерти за клавир. Тој е еден од најдобрите што сум ги чул", оценува друг гледач.

„Се гледа дека свирењето клавир му чини радост. И прекрасно е како оваа радост ја пренесува до публиката", заклучува трет.

Покрај пофалбите од публиката, на работата и талентот на Симон Трпчевски не е имуна ниту критиката. Николас Матиас, кодиректор и вицепретседател на ИМГ од Лондон, за Дојче веле изјави:

„Симон Трчевски е еден од водечките млади пијанисти од неговата генерација кои денес настапуваат на меѓународната сцена. Тој веќе имаше успешни настапи со големи оркестри од Америка и Европа. На турнејата со Филхармнонискиот оркестар на Холандското радио Трпчески го свири Рахмањинов и Прокофјев кои се дел од неговиот постојан репертоар. Тој во Велика Британија го завршува и снимањето на сите концерти на Рахмањинов со Ливерпулскиот Филхармонијски оркестар."

Автор: Силвера Падори-Кленке

Редактор: Елизабета Милошевска Фиданоска