صدها سرباز افغان از تاجیکستان به کشورشان منتقل شدند

با پیشروی طالبان و سقوط برخی ولسوالی‌ها در شمال افغانستان، در این اواخر صدها تن از نیروهای امنیتی افغانستان از مرز عبور کرده و وارد تاجیکستان شده بودند.

هفته گذشته مقام‌های تاجیکستان از ورود صدها عضو نیروهای امنیتی افغانستان از گذرگاه مرزی شیرخان بندر در ولایت قندوز به این کشور خبر دادند. این هفته نیز از ورود بیش از ۱۰۰۰ عضو نیروهای امنیتی از ولایت بدخشان به تاجیکستان گزارش شد.

یک منبع امنیتی تاجیکستان به خبرگزاری رویترز گفته است که حکومت افغانستان چند هواپیما را به میدان هوایی کولاب فرستاد که شب گذشته با ۲۸۰ تن از اعضای نیروهای امنیتی عازم افغانستان شدند. او گفت که قرار است ۳۰۰ عضو نیروهای امنیتی در روزهای آینده به افغانستان انتقال داده شوند.

حمدالله محب، مشاور امنیت ملی افغانستان روز گذشته گفت سربازانی که به تاجیکستان فرار کرده اند، دوباره برگردانده می‌شوند تا جنگ علیه شورشیان طالبان را از سر گیرند. او در یک کنفرانس خبری گفت: «آنهای که به تاجیکستان رفته بودند، دوباره برمی‌گردند و مصروف خدمت به مردم و دفاع از فیض آباد خواهند شد.»

محب افزوده است که حدود ۲۳۰۰ عضو نیروهای امنیتی که در نقاط مختلف کشور قرارگاه‌های شان را ترک کرده بودند، دوباره به خدمت برگشته اند.

عبور سربازان افغان از مرز به تاجیکستان زنگ خطری را برای این همسایه افغانستان در آسیای مرکزی به صدا درآورد. رئيس جمهور تاجیکستان روز دوشنبه دستور داد که ۲۰ هزار سرباز برای تامین امنیت مرز این کشور با افغانستان بسیج شوند.

Hm/af/rsh (Reuters)